भाजपचे खासदार अनंतकुमार हेगडे यांनी राष्ट्रपिता महात्मा गांधी यांच्याबद्दल केलेले वक्तव्य अत्यंत आक्षेपार्ह असून भाजपाकडून महात्मा गांधींबद्दल वारंवार अशी अपमानजनक वक्तवे केली जातात. अशी वक्तव्ये करणाऱ्यांना भाजपचे नेतृत्व पाठीशीच घालत असल्याचे दिसते. हेगडे यांनी आज केलेले वक्तव्य संतापजनक आणि निषेधार्ह आहे. यावर भाजपच्या वरिष्ठ नेत्यांनी माफी मागावी, अशी मागणी महसूलमंत्री बाळासाहेब थोरात यांनी केली आहे.
हेगडेच्या वक्तव्याचा समाचार घेताना थोरात पुढे म्हणाले की, महात्मा गांधी यांच्याबद्दलच्या वक्तव्यातून हेगडेंची बौद्धीक दिवाळखोरीच दिसून येते. यांच्या पूर्वजांनीही ब्रिटिशांशी हात मिळवून स्वातंत्र्यलढ्याला कायम विरोधच केला, हे खरे भाजपाचे रूप आहे. पिढ्यान पिढ्या ज्या विचारांनी महात्मा गांधींना विरोध केला, त्यांनाच आता महात्मा गांधी वंदनीय झाले आहेत हे ढोंगच आहे. एकीकडे महात्मा गांधी वंदनीय आहेत असे दाखवायचे आणि दुसरीकडे याच प्रवृत्ती त्यांच्याबद्दल हीन दर्जाची वक्तव्य करतात हे थोतांड आता उघड झाले आहे. भाजपाने स्वातंत्र्य लढ्याच्या चळवळीबदद्ल बोलावे हेच मोठे नाटक आहे. ब्रिटिश साम्राजाविरोधातील स्वातंत्र्यलढ्यात लाखो लोकांनी योगदान दिले. संपूर्ण आयुष्य स्वातंत्र्याच्या लढाईसाठी खर्ची घातले. त्यावेळी हेगडे व त्यांचे पूर्वज ब्रिटीशांची गुलामगिरी करण्यात धन्यता मानत होते. स्वातंत्र्य लढ्याला नाटक म्हणून त्याची अवहेलना करुन अनंतकुमार हेडगे यांनी संपूर्ण स्वातंत्र्यलढ्याचाच अपमान केलेला आहे. महात्मा गांधींच्या स्वातंत्र्य लढ्याला नाटक म्हणणे यातूनच त्यांची मानसीकता स्पष्ट होते. याआधीही याच विचारांच्या लोकांनी महात्मा गांधींबद्दल अत्यंत हीन दर्जाची विधाने केलेली आहेत, असे थोरात म्हणाले.
