अयोध्येतील राम मंदिरातील कथित आर्थिक चोरीच्या प्रकरणाने देशात संतापाची लाट आहे. राम मंदिराचे श्रेय घेणाऱ्या केंद्रातील मोदी सरकारवर आता प्रचंड टीका होत आहे. आता एका भाजप आमदारानेच शाप दिला आहे. एका व्हायरल व्हिडिओमध्ये ते कथितपणे असे म्हणताना दिसत आहेत की, ‘अयोध्येतील राम मंदिराच्या देणगीच्या चोरीमध्ये जे कोणी सहभागी आहेत, त्यांना कॅन्सर होईल आणि त्यांचा अत्यंत वेदनादायक मृत्यू होईल’.
उन्नाव जिल्ह्यातील पुरवा विधानसभा मतदारसंघाचे प्रतिनिधित्व करणारे अनिल सिंग यांनी रविवारी मौरावान येथील एका भाजप कार्यक्रमात हे कथित वक्तव्य केले. पीटीआयने हे वृत्त दिले आहे.
व्हिडिओमध्ये आमदार असे म्हणताना ऐकू येत आहे की, ‘ज्यांनी प्रभू रामाच्या मंदिरात चोरी केली आहे, त्यांना कॅन्सर होईल. ही देवाची फाशीची शिक्षा असेल. एक वर्ष वाट पाहा, त्यांना कॅन्सर झालेला दिसेल.’
जबाबदार लोकांवर सरकार कायदेशीर कारवाई करेलच, पण ‘प्रभू राम त्यांना अशी शिक्षा देतील की ते अत्यंत वेदनादायक मृत्यू मरतील, आणि त्यांच्या पुढील सात पिढ्या मंदिरात चोरी करण्याचे परिणाम लक्षात ठेवतील’, असे त्यांनी या व्हिडिओमध्ये बोलले.
अयोध्येतील राम मंदिरात झालेल्या देणग्यांच्या कथित चोरीवरून उत्तर प्रदेशात सध्या मोठा राजकीय वाद पेटला आहे.
देणग्यांच्या चोरीच्या आरोपांनंतर मंदिर ट्रस्टच्या विनंतीवरून उत्तर प्रदेश सरकारने १३ जून रोजी या प्रकरणाच्या चौकशीसाठी एक एसआयटी (SIT) स्थापन केली होती.
या एसआयटीच्या अहवालाच्या आधारे — अविनाश शुक्ला, अनुकल्प मिश्रा, लवकुश मिश्रा, मनीष कुमार यादव, करुणेश पांडे, रामशंकर मिश्रा, सुभाष श्रीवास्तव आणि रामशंकर ऊर्फ तिन्नू यादव — अशा आठ जणांना अटक करण्यात आली आहे.
विरोधी पक्षांनी असा आरोप केला आहे की केवळ छोट्या लोकांवर कारवाई केली जात आहे आणि मुख्य सूत्रधार अजूनही मोकळे आहेत.
