मांत्रिकाच्या मदतीने वाळवा तालुक्यातील चिकुर्डे गावच्या स्मशानभूमीत काळ्या कापडात नारळ, लिंबू, काळ्या बाहुल्या, त्यावर मुलींचे फोटो लावून दाभण खुपसण्याचा अघोरी प्रकार उघडकीस आला आहे. होळी पौर्णिमेपासून रस्त्यालगत असणाऱया स्मशानभूमीत सुरू असलेला जादूटोण्याचा हा प्रकार आज महाराष्ट्र अंधश्रद्धा निर्मूलन समितीच्या कार्यकर्त्यांनी उघडकीस आणला. स्मशानभूमीत जादूटोण्याचा प्रकार उघडकीस आल्याने गावात दहशत निर्माण झाली आहे.
अंधश्रद्धा निर्मूलन समितीचे प्रधान सचिव संजय बनसोडे, निवृत्त उपप्राचार्य बी. आर. जाधव, निवृत्त प्राचार्य डॉ. सुदाम माने, विनोद मोहिते यांनी हा प्रकार उघडकीस आणून स्मशानभूमीची स्वच्छता केली. या प्रकाराचे गांभीर्य लक्षात घेऊन मुळापर्यंत तपास करू. कोणत्याही मुलींची ओळख जाहीर न करता गोपनीय तपास करून दोषींवर गुन्हे दाखल करू, असे कुरळप ठाण्याचे सहायक पोलीस निरीक्षक युवराज सरनोबत यांनी सांगितले.
‘अंधश्रद्धा निर्मूलन’च्या कार्यकर्त्यांनी पोलीस पाटलांच्या समक्ष काळ्या कापडातील लटकत्या बाहुल्या व इतर साहित्य काढले. काळे कापड सोडल्यावर त्यातून नारळ, काळ्या बाहुल्या, लिंबू व मुलींच्या रंगीत फोटोंना टोकदार दाभणातून नारळात खुपसले होते. तर, नारळाला लाल रंगाचा दोरा गुंडाळून त्यात कागदी चिठ्ठय़ा खुपसल्या होत्या. त्या उघडून पाहिल्यावर कागदावर मुलीचे नाव लिहिले आहे. अशी पाच गाठोडी आहेत. यांत पाच वेगवेगळ्या मुलींचे फोटो व नावे आहेत. एका कागदावर एका मुलाचे नाव आहे. हे सर्व साहित्य पोलिसांनी ताब्यात घेतले आहे.
‘अंनिस’चे विनोद मोहिते म्हणाले, ‘या प्रकारातील फोटो पाहता, सोशल मीडियावरील फोटो घेऊन रंगीत झेरॉक्स काढल्याचे दिसते. आपल्या मुली सोशल मीडियावर फोटो टाकतात, त्याचा दुरुपयोग होतो. या बाबतीत पालकांनी काळजी घ्यावी,’ असे आवाहन त्यांनी केले.
अंनिसचे संजय बनसोडे यांनी या प्रकरणाचा पोलिसांनी खोल तपास करावा, अशी मागणी अर्जाद्वारे केली आहे.
