चंद्रपूर जिल्ह्यातल्या भद्रावती तालुक्यातील मांगली गावातील जगन्नाथ महाराज मठात दोघांचा खून झाल्याची धक्कादायक घटना उघडकीला आली आहे. मधुकर खुजे आणि बाबुराव खारकर अशी मृतांची नावं असून ते मांगली गावातील रहिवासी आहेत.
मठात असलेली दानपेटी फोडलेल्या अवस्थेत आढळली आहे. त्यामुळे दानपेटी फोडायला आलेल्या चोरांनी हत्या केली असावी असा अंदाज वर्तवला जात आहे. कारण, गेल्या काही काळात चंद्रपुरात चोरी आणि त्यामुळे होणाऱ्या हत्यांचं सत्र वाढलं आहे.
भद्रावती तालुक्यातील मांगली येथील मधुकर खुजे आणि बाबुराव खारकर यांची शेती गावात गावातील जगन्नाथ महाराज मठालगत आहे. ते रोज शेतात राखणीसाठी जातात. शेताजवळ मंदिर लागून असल्याने तिथे विसावा घेतात. बुधवारी पहाटे मंदिरामध्ये या दोघांचे मृतदेह रक्ताच्या थारोळात पडलेले दिसले. घटनेची माहिती मिळताच गावकऱ्यांनी मंदिराकडे धाव घेतली.
मंदिरातील दानपेटी मंदिरापासून काही अंतरावर फोडलेल्या स्थितीत आढळून आली. घटनेची माहिती पोलिसांना देण्यात आली आहे. पोलिसांनी घटनास्थळ गाठून तपासाला सुरुवात केली आहे. श्वानपथकाला पाचारण करण्यात आले असून पुढील तपास पोलीस करीत आहेत.
