पर्यावरणाला धक्का न लावता विकास व्हावा; मुख्यमंत्री उद्धव ठाकरे यांचा पुनरुच्चार

976

विकासाबाबत नेहमी बोलले जाते पण पर्यावरणाचे संरक्षण करणे आपले कर्तव्य आहे, असे सांगत मुख्यमंत्री उद्धव ठाकरे यांनी पर्यावरणाला धक्का न लावता विकास व्हावा, या आपल्या भूमिकेचा पुनरुच्चार केला. महाराष्ट्रातील पश्चिम घाटामधील एकूण 2092 गावांचे क्षेत्र पश्चिम घाट पर्यावरण संवेदनशील क्षेत्राच्या अंतिम अधिसूचनेमध्ये समाविष्ट करण्याची विनंतीही त्यांनी केली. केंद्रीय पर्यावरण मंत्री प्रकाश जावडेकर यांनी गुरुवारी व्हिडीओ कॉन्फरन्सद्वारे या क्षेत्राच्या प्रारूप अधिसूचनेसंदर्भात चर्चा केली.

विकास करताना पर्यावरणाला प्राधान्य राहील, अशी आमची भूमिका असून महाराष्ट्राच्या पश्चिम घाटातील पर्यावरण संवेदनशील क्षेत्रामध्ये अखंडता राहावी अशी महाराष्ट्राची भूमिका आहे असे मुख्यमंत्री उद्धव ठाकरे यांनी स्पष्ट केले. पश्चिम घाट क्षेत्रातील पर्यावरण संवेदनशील क्षेत्र अंतिमतः घोषित झाल्यावर अशा क्षेत्रात काही कामांवर जल विद्युत प्रकल्प, विशिष्ट उद्योग यांच्यावर निर्बंध येतील किंवा खनन, औष्णिक उर्जा, मोठी बांधकामे प्रतिबंधित होतील. याबाबतीत काटेकोर कार्यवाही केली जाईल आणि सर्व निर्बंध पाळले जातील असे आश्वासनही मुख्यमंत्री उद्धव ठाकरे यांनी यावेळी दिले. कोरोनाचे संकट टळल्यानंतर सर्व संबंधित राज्यांशी परत एकदा याबाबत विस्तृतपणे बोलून निर्णय घेण्यात येईल असे केंद्रीय पर्यावरण मंत्री प्रकाश जावडेकर यांनी सांगितले.

मुख्यमंत्री उद्धव ठाकरे यांच्यासह कर्नाटकचे मुख्यमंत्री बी. एस. येडीयुरप्पा, गोव्याचे मुख्यमंत्री प्रमोद सावंत, गुजरात, तामिळनाडू आणि केरळचे सचिव यांनी आपापली भूमिका मंडळी. केंद्रीय पर्यावरण राज्य मंत्री बाबुल सुप्रियो, महाराष्ट्राचे वनमंत्री संजय राठोड, प्रधान मुख्य वनसंरक्षक सुरेशचंद्र गैरोला तसेच वन विभागाचे अतिरिक्त मुख्य सचिव मनुकुमार श्रीवास्तव, मुख्यमंत्री सचिवालयातील अतिरिक्त मुख्य सचिव आशिष कुमार सिंह, प्रधान सचिव विकास खारगे आदी या चर्चेत सहभागी झाले होते.

आपली प्रतिक्रिया द्या