एप्रिल महिन्यात कोरोनामुक्त झालेल्या गोव्यात कोरोनाग्रस्तांची संख्या 10 झाली

बातमी शेअर करा :
सामना फॉलो करा

एप्रिल महिन्यामध्ये गोव्यामध्ये एकही कोरोनाग्रस्त नव्हता. यामुळे ते देशातील कोरोनामुक्त राज्य बनले होते. मात्र मे महिन्यात गोव्यामध्ये कोरोनाग्रस्त सापडायला सुरुवात झाली असून 16 मे रोजी म्हणजेच शनिवारी कोरोनाग्रस्तांची संख्या 10 पर्यंत पोहोचली होती. गोव्यात कोरोना बाधितांच्या संख्येने प्रथमच दोन अंकी आकडा गाठला आहे. नवीन दोन्ही रुग्ण वास्को येथील आहेत.

कोलकाता येथे बार्ज सोडण्यासाठी गेलेल्या वास्कोमधील सातपैकी तीन जणांना कोरोनाची बाधा झाली होती. या रुग्णांची दुसरी कोरोना चाचणी गोवा मेडिकल कॉलेजमध्ये करण्यात आली. त्यात दोघे पॉझिटीव्ह आढळून आले तर एकाचा रिपोर्ट निगेटिव्ह आला आहे. जे चार जण निगेटीव्ह आले आहेत त्यांना क्वारंटाईन केले जाणार आहे.

गोव्यात मजा मारण्यासाठी येऊ नका, मुख्यमंत्री प्रमोद सावंत यांचे आवाहन

देशातील पहिले कोरोना मुक्त राज्य बनलेल्या गोव्यात बुधवारी एकाच दिवसात सात रुग्ण मिळाले होते. गुरुवारी त्यात आणखी एका रुग्णाची भर पडली ज्यामुळे तिथली रुग्ण संख्या 8 झाली होती. 8वा रुग्ण गोमंतकीय खलाशी होता आणि तो मुंबईतून गोव्यात दाखल झाला होता. गोव्यात पहिले सात रुग्ण सापडले होते त्यातील 6 जण एकाच कुटुंबातील असल्याची माहिती मिळाली होती. आतापर्यंत गोव्यात सापडलेले सगळे रुग्ण हे गोव्याबाहेरून आलेले आहेत.