एअर इंडियामधील क्रू शेड्यूलिंग आणि रोस्टरिंगशी संबंधित निष्काळजीपणा गांभीर्याने घेत भारतीय नागरी विमान वाहतूक महासंचालनालयाने (डीजीसीए) तीन वरिष्ठ अधिकाऱ्यांना सर्व संबंधित जबाबदाऱ्यांवरून हटवण्याचे निर्देश दिले आहेत. सूत्रांनी दिलेल्या माहितीनुसार, हे तीन अधिकारी ऑपरेशनल त्रुटींसाठी जबाबदार असल्याचे आढळून आले आहे आणि आता त्यांना कोणत्याही क्रू व्यवस्थापन कामापासून दूर ठेवण्यात येईल.
डीजीसीएने एअर इंडियावर कठोर कारवाई केली आहे. एअर इंडियाला त्यांच्या तीन वरिष्ठ अधिकाऱ्यांना क्रू शेड्यूलिंग आणि रोस्टरिंगशी संबंधित सर्व भूमिकांमधून काढून टाकण्याचे निर्देश दिले आहेत. 3 अधिकाऱ्यांना हटवण्याचे निर्देश डीजीसीएने एअर इंडियाला दिले आहेत. तसेच 10 दिवसांत अहवाल मागितला आहे. डीजीसीएने एअर इंडियाला या अधिकाऱ्यांविरुद्ध तात्काळ अंतर्गत शिस्तभंगाची कारवाई सुरू करण्याचे आणि त्याबाबतची माहिती देणारा अहवाल 10 दिवसांच्या आत संस्थेला सादर करण्याचे निर्देश दिले आहेत. एअरलाइनच्या सुरक्षा आणि ऑपरेशनल मानकांमध्ये पारदर्शकता आणि जबाबदारी सुनिश्चित करण्यासाठी हे पाऊल उचलण्यात आले आहे.
12 जून रोजी अहमदाबाद विमानतळावरून लंडनला जाणाऱ्या एअर इंडियाच्या विमानाच्या अपघातानंतर, नागरी विमान वाहतूक महासंचालनालयाने (डीजीसीए) हा निर्णय घेतला आहे. भविष्यात अशा चुका पुन्हा होऊ नयेत म्हणून डीजीसीएने एअर इंडियाला त्यांच्या वेळापत्रक प्रक्रिया सुधारण्यास सांगितले आहे. डीजीसीएने असेही स्पष्ट केले आहे की आता उड्डाण सुरक्षेबाबत कोणतीही तडजोड केली जाणार नाही.
12 जून रोजी झालेल्या या भयानक विमान अपघातात विमानातील 242 प्रवाशांपैकी 241 प्रवाशांना जीव गमवावा लागला. टेकऑफ दरम्यान विमानाचे संतुलन बिघडल्याने आणि ते जवळच्या वैद्यकीय महाविद्यालयाच्या इमारतीशी आदळल्याने हा अपघात झाला. या घटनेत वैद्यकीय महाविद्यालयाच्या मेसमध्ये जेवणाऱ्या अनेक डॉक्टरांचाही मृत्यू झाला. त्यानंतर डीजीसीएकडून ही कारवाई करण्यात आली आहे.
