इस्रायल आणि इराण यांच्यातील वाढत्या संघर्षाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी मोठा दावा केला आहे. हिंदुस्थान आणि पाकिस्तान यांच्यातील तणाव कमी करण्यात यश मिळवल्याचा हवाला देत, इस्रायल आणि इराण यांच्यातही शांतता प्रस्थापित करू शकतो, असे ट्रम्प यांनी म्हटले आहे. रविवारी ट्रम्प यांनी त्यांच्या ‘ट्रुथ सोशल’ या सोशल मीडियावर एक पोस्ट करत असं म्हटलं आहे.
डोनाल्ड ट्रम्प यांनी आपल्या पोस्टमध्ये लिहिले, “इराण आणि इस्रायल यांनी एक करार केला पाहिजे आणि ते करतील, ज्याप्रमाणे मी हिंदुस्थान आणि पाकिस्तानला करार करण्यास भाग पाडले. त्या वेळी अमेरिकेशी व्यापाराच्या माध्यमातून दोन्ही देशांच्या नेत्यांना समजावून सांगितले आणि त्यांनी त्वरित निर्णय घेऊन संघर्ष थांबवला.” “लवकरच इस्रायल आणि इराण यांच्यात शांतता प्रस्थापित होईल,” असा दावाही त्यांनी केला.
दरम्यान, इस्रायलने इराणवरील हवाई हल्ले तिसऱ्या दिवशीही सुरू ठेवले असून इराणच्या नतांझ आणि इस्फहान येथील प्रमुख अण्वस्त्र केंद्रांना लक्ष्य केले आहे. सॅटेलाइट फोटोमधून या ठिकाणी मोठ्या प्रमाणात नुकसान झाल्याचे स्पष्ट झाले आहे. इस्रायलने हे हल्ले प्रतिबंधात्मक असल्याचे सांगितले असून, इराण अण्वस्त्रे विकसित करत असल्याचा आरोप केला आहे. इराणने मात्र हे आरोप चुकीचे असल्याचं म्हटलं आहे. या हल्ल्यांमुळे मध्यपूर्वेतील तणाव आणखी वाढला आहे.
