आगामी पालिका निवडणुकीत इच्छुक उमेदवारांचे अर्ज पाणी, कर, पोलीस अशा विविध विभागांची ना हरकत प्रमाणपत्रे आदी विविध कारणास्तव बाद करणाऱ्या निवडणूक आयोगाविरोधात उमेदवारांनी हायकोर्टात याचिका दाखल केल्या आहेत. या याचिकांवर आज शुक्रवारी मुख्य न्यायमूर्तीं श्री चंद्रशेखर यांच्या खंडपीठासमोर सुनावणी घेण्यात येणार आहे. त्यामुळे या न्यायालयाकडून दिलासा मिळणार की नाही याकडे उमेदवारांचे लक्ष लागले आहे.
निवडणूक आयोगाच्या चेकलिस्टमध्ये तरतूद नसतानाही निवडणूक निर्णय अधिकारी बेकायदेशीरपणे पाणी, कर, पोलीस अशा विविध विभागांची ना हरकत प्रमाणपत्रांची मागणी करून तांत्रिक कारणांमुळे उमेदवारी अर्ज फेटाळत आहेत. आयोगाचा हा निर्णय मनमानी व भेदभाव करणारा असल्याचा दावा करत अपक्ष उमेदवार मोझम अली मीर यांनी याप्रकरणी हायकोर्टात याचिका दाखल केली आहे.
हायकोर्टाने या याचिकेची आज दखल घेत याप्रकरणी निवडणूक आयोगाला भूमिका स्पष्ट करण्याचे आदेश दिले आहेत. याव्यतिरिक्त आणखी निवडणूकसंबंधित 5 याचिका दाखल करण्यात आल्या असून त्यावरही उद्या शुक्रवारी मुख्य न्यायमूर्तींच्या खंडपीठासमोर सुनावणी होणार आहे.
वॉर्ड क्र. 119 मधील शिंदे गटाची उमेदवारी रद्द करा
विक्रोळी वॉर्ड क्र. 119 मधून शिंदे गटाने राजेश सोनावले यांना उमेदवारी दिली आहे. सोनावले हे शिवशाही बहुउद्देशीय सुशिक्षित बेरोजगार सहकारी संस्था मर्यादित या संस्थेचे अध्यक्ष असून, ही संस्था पालिकेची पंत्राटदार आहे. या कारणास्तव ते निवडणूक लढवण्यास अपात्र आहेत, असा दावा करत अपक्ष उमेदवार संदीप खरात यांनी हायकोर्टात याचिका दाखल केली आहे. सोनावलेंची उमेदवारी रद्द करण्याची मागणी केली आहे. या याचिकेवर पुढील आठवडय़ात सुनावणी होणार आहे.
