इस्त्रायलचे संरक्षणमंत्री इस्रायल काट्झ यांनी एका धक्कादायक खुलासा केला आहे. एका मुलाखतीत ते म्हणाले आहेत की, “इस्त्रायलने इराणचे सर्वोच्च नेते अयातुल्ला अली खामेनी यांना ठार मारण्याची योजना आखली होती. मात्र योग्य संधी न मिळाल्याने ही योजना प्रत्यक्षात येऊ शकली नाही.” ही मुलाखत इस्त्रायलच्या चॅनल 13 या वृत्तवाहिनीवर प्रसारित झाली.
काट्झ यांनी सांगितले की, “जर खामेनी आमच्या टप्प्यात असते, तर आम्ही त्यांना ठार मारले असते. आम्ही त्यांना शोधण्याचा खूप प्रयत्न केला, पण ते भूमिगत झाले आणि त्यांनी आपल्या कमांडर्सशी संपर्क तोडला, त्यामुळे ही योजना प्रत्यक्षात आणणे शक्य झाले नाही.” त्यांनी पुढे असेही नमूद केले की, खामेनी यांना आपल्या जीवाला धोका आहे, याची जाणीव होती, त्यामुळे ते लपले होते.
इस्रायल आणि इराणमधील अलिकडच्या युद्धानंतर हे विधान आले आहे. अमेरिकेच्या मध्यस्थीने केलेल्या युद्धबंदीनंतर इराणने कतारच्या अल उदेद हवाई तळावर क्षेपणास्त्र हल्ला करून अमेरिकेच्या हल्ल्यांना प्रत्युत्तर दिल्यानंतर हा संघर्ष संपला.
