कर्नाटकचा अनुभवी फलंदाज करुण नायरने रणजी करंडकात दमदार फॉर्म कायम ठेवत केरळविरुद्ध 389 चेंडूंत 233 धावा ठोकल्या. त्याने या खेळीसह बीसीसीआयच्या निवड समितीला पुन्हा एकदा आपली आठवण करून दिली आहे. सुरुवातीच्या धक्क्यांनंतर नायरने कृष्णन श्रीजीतसोबत 124 आणि रविचंद्रन स्मरणसोबत नाबाद 297 धावांची भागीदारी करत कर्नाटकला मजबूत स्थितीत पोहोचवले. 33 वर्षीय नायरसाठी ही खेळी अत्यंत महत्त्वाची ठरली आहे, कारण दक्षिण आफ्रिकेच्या मालिकेपूर्वी त्याचा फॉर्म राष्ट्रीय निवड समितीचे लक्ष वेधणारा ठरू शकतो.
