तुझ्या आई वडीलांनी लग्नात मला काहीच दिले नाही,तुला नांदायचे असेल तर मला 10 लाख रुपये दे’ अशी सात महिन्यांच्या गर्भवती पत्नीकडे मागणी करून शारिरीक व मानसिक छळ करून बेदम मारहाण केली.या प्रकरणी सिध्दी रोहीत दुधाणे (26) यांनी करवीर पोलीस ठाण्यात पती रोहित अर्जुन दूधाने याच्याविरोधात तक्रार दाखल केली आहे.
फिर्यादी सिध्दी दुधाणे यांनी फिर्यादीत म्हटले आहे, ऑक्टोंबर 2024 ते 2 जून 2025 या कालावधीत वरणगे पाडळी गावात पती रोहित दूधाणे याने ‘तुझ्या आई वडीलांनी मला लग्नात काहीच दिलेले नाही म्हणून छळ सुरु केला होता.माहेरुन 10 लाख रुपये आणण्यासाठी तगदा लावला होता.पैसे आणले नाहीस तर ठार मारण्याची धमकी दिली होती.
संसार टिकवण्यासाठी सिध्दी या पतीकडून होणारा शारिरीक व मानसिक छळ सहन करीत होत्या.पतीकडून जास्तच त्रास होऊ लागल्याने,त्यांनी करवीर पोलीस ठाण्यात पतीच्या विरोधात तक्रार दाखल केली.पोलीस निरीक्षक किशोर शिंदे यांच्या मार्गदर्शनाखाली सहायक फौजदार पाटील तपास करीत आहेत.
नातेवाईकांना मारहाण
पंधरा दिवसांपूर्वी पुणे जिल्ह्यातील वैष्णवी हगवणे हुंडाबळीचे प्रकरण ताजे असतानाच,आता कोल्हापूर जिल्ह्यातही असाच प्रकार समोर आला आहे.रोहितचे कारनामे समजल्यानंतर पीडितेच्या नातेवाईकांनी त्याच्यावर नजर ठेवली होती.अनैतिक संबंध असलेल्या महिलेसोबत तो एका लाॅजवर दोन दिवसांपूर्वी सापडल्या -नंतर चिडलेल्या रोहितने पीडितेच्या नातेवाईकांना मारहाण केली असल्याचे पोलिसांनी सांगितले.त्यामुळे रोहितच्या गुन्हेगारी पार्श्वभूमीची तपासणी पोलीसांकडून सुरू आहे.
