कोल्हापूरात टप्प्या-टप्प्याने शाळा सुरू करणार – जिल्हाधिकारी दौलत देसाई

जिल्ह्यातील सर्व माध्यमिक शाळांतील शिक्षकांची 7 डिसेंबर पर्यंत कोविड चाचणी व पूर्व तयारी करून,इयत्ता ९ वी ते १२ पर्यंतचे वर्ग टप्याटप्याने सुरू करण्याचा निर्णय संस्थाचालक,पदाधिकारी यांच्या बैठकीत घेण्यात आल्याची माहिती जिल्हाधिकारी दौलत देसाई यांनी दिली.

देशात दिल्ली,मुंबई,पुणे परिसरात कोवीड रुग्णांच्या संख्येत वाढ होत आहे.त्यात नुकत्याच झालेल्या दसरा-दिवाळी सणामुळे लोकांचा एकमेकांशी झालेला संपर्क पाहता,नजिकच्या काळात कोरोना रुग्णांच्या प्रादुर्भावात वाढ होण्याची शक्यता असल्याने हा निर्णय घेण्यात आला.

जिल्हाधिकारी कार्यालयात राजर्षी छत्रपती शाहू सभागृहात आज संस्थाचालक,पदाधिकारी यांची व्हिडीओ कॉन्फरन्स घेण्यात आली.यावेळी जि.परिषदेचे मुख्य कार्य.अधिकारी अमन मित्तल, शिक्षणाधिकारी किरण लोहार,जिल्हा आरोग्य अधिकारी डॉ.योगेश साळे उपस्थित होते.

स्थानिक संस्था व स्थानिक स्वराज्य संस्थेच्या सहकार्याने शाळेची स्वच्छता करावी. पालकांची संमतीपत्र आणि दि.10 नोव्हेंबर रेाजीच्या परिपत्रकानुसार संस्थांनी केलेल्या पूर्वतयारीनुसार शाळा सुरू कराव्यात.शिक्षकांनी प्रथम त्यांच्या स्तरावर दि.24 ते 30 नोव्हेंबरपर्यंत आर.टी.पी.सी.आर.चाचणी कोव्हिड केंद्रांवर करून घ्यावी.तालुका स्तरावरही कोव्हिड केंद्रांवर शिक्षकांनी आर.टी.पी.सी.आर. चाचणी करून घेण्यास प्राधान्य द्यावे.ज्या शिक्षकांना खासगी प्रयोग शाळांमार्फत कोविड चाचणी करायची असेल त्यांना तशी मुभा राहील.शाळा सुरू करण्याबाबत पालकांचे संमतीपत्र अनिवार्य असावे आदी सुचना जिल्हाधिकारी दौलत देसाई यांनी दिल्या.

तसेच दि.23 नोव्हेंबरपासून शाळा सुरू करणे बंधनकारक नाही.सर्व शिक्षकांची कोविड चाचणी पूर्ण झाल्याशिवाय व मुलांना शाळेत पाठवण्यासाठी पालकांनी लेखी संमती दिल्याशिवाय शाळा सुरू करता येणार नाहीत. यासाठी कालावधी लागणार असल्याने,दि.7 डिसेंबर नंतर शाळा सुरु केल्या तरी त्यास संमती देण्यात आली.त्यानंतर टप्याटप्याने योग्य ती खबरदारी व काळजी घेत,जिल्ह्यातील शाळा संस्थाचालकांनी सुरू कराव्यात,असा निर्णयही या बैठकीत घेण्यात आला.शाळा पूर्ण क्षमतेने सुरू होत नाहीत,तोपर्यंत ऑनलाईन शिक्षण सुरू ठेवणे आवश्यक आहे.दरम्यानच्या कालावधीत कोरोना संसर्गात वाढ दिसून आली तर या निर्णयात बदल होऊन शाळा सुरु ठेवण्यास स्थगिती देण्यात येईल, असा निर्णयही घेण्यात आला.

आपली प्रतिक्रिया द्या