महाड औद्योगिक वसाहतीच्या अतिरिक्त क्षेत्रातील प्रसोल कंपनीमध्ये आज सकाळी दहाच्या सुमारास आग लागल्याची घटना घडली. या आगीत कोणतीही जीवितहानी झाली नसली तरी, कंपनीचे आर्थिक नुकसान झाले आहे. अग्निशामन दलाने तातडीने घटनास्थळी धाव धेत केलेल्या कारवाईमुळे आग अर्धा ते पाऊण तासात नियंत्रणात आली, ज्यामुळे मोठा अनर्थ टळला.
सकाळी दहाच्या सुमारास कंपनीच्या परिसरातून धुराचे लोट दिसू लागल्यानंतर तातडीने प्रशासनाला याची माहिती देण्यात आली. आगीची माहिती मिळताच महाड एमआयडीसी अग्निशमन दल आणि महाड नगर परिषदेचे पथक तातडीने घटनास्थळी दाखल झाले. ही आग रासायनिक स्वरूपाची असल्याने त्यावर पाण्याचा वापर करणे शक्य नव्हते, यावेळी महाड उत्पादक संघटनेने पुरवलेल्या फोम आणि वाळूच्या साहाय्याने आगीवर नियंत्रण मिळवण्यात आले.
मुंबई-गोवा महामार्गावर केमिकल वाहून नेणारा टँकर पेटला, पन्हळे माळवाडी येथील घटना
याबाबत महाड एमआयडीसी पोलीस ठाण्याचे प्रभारी अधिकारी जीवन माने यांनी माहिती दिली. ते म्हणाले “सकाळी दहाच्या सुमारास आग लागल्याची माहिती मिळताच सर्व यंत्रणांनी वेगाने प्रतिसाद दिला. एकत्रित प्रयत्नांमुळे आग लवकर आटोक्यात आणणे शक्य झाले.”
या घटनेत कोणीही जखमी झालेले नाही, ही दिलासादायक बाब आहे. मात्र, कंपनीच्या मालमत्तेचे नुकसान झाले असून नुकसानीचा नेमका आकडा समजू शकलेला नाही. आगीचे नेमके कारण काय होते? याचा तपास सुरू असून कंपनी व्यवस्थापनाकडून यासंदर्भात माहिती मागवण्यात आली आहे, असे पोलिसांनी सांगितले.
