ग्यानबा-तुकारामांचा जयघोष, टाळ-मृदंगाच्या गजर, भगव्या पताका फडकावत ऊन-पावसाचा अनुभव घेत लाखो वैष्णवांसह संतश्रेष्ठ ज्ञानेश्वर महाराजांचा पालखी सोहळा दिवे घाटाची अवघड चढण पार करून रात्री नऊच्या सुमारास संत सोपानदेवांच्या सासवड भूमीत मुक्कामी दाखल झाला. पालखी तळावर चोपदारांनी हरवलेल्या वस्तूंचा तपशीलासह सुचना आणि मंगळवारी सकाळी निघायचे आहे, असा पुकारा केल्यावर समाजआरती झाली. त्यानंतर दोन दिवसांच्या वास्तव्यासाठी भव्य सोहळा सासवडला विसावला. तत्पूर्वी माऊलींच्या स्वागतासाठी पालखी तळावर पावसाने काही काळ हजेरी लावली.
सकाळी सहा वाजता संतश्रेष्ठ ज्ञानेश्वर माऊली आणि जगद्गुरू संत तुकाराम महाराज यांच्या पालखी सोहळ्याचे सासवडकडे प्रस्थान झाले. पुणे ते हडपसर मार्गावर दर्शन आणि स्वागतासाठी मोठी गर्दी झाली होती. त्यानंतर संत तुकाराम महाराजांची पालखी सोलापूर रस्त्याने कदम वाकवस्ती मुक्कामाकडे मार्गस्थ झाली. तर, संत ज्ञानेश्वर महाराजांची पालखी सासवड रस्त्याने मार्गस्थ झाली.
दुपारच्या सत्रात पालखीचा वडकी येथे विसावा झाल्यावर सायंकाळी साडेचारच्या सुमारास पालखीने दिवे घाट चढण्यास प्रारंभ केला. रस्ता रुंदीकरणांमुळे घाटाची वाट बिकट होणार, अशी शक्यता वर्तवली जात होती. मात्र, प्रशासनाने योग्य ती खबरदारी घेतल्याने मार्ग सुकर झाला. सायंकाळी सहा वाजता सोहळा घाट माथ्यावर पुरंदर तालुक्याच्या हद्दीत प्रवेश करताना बारामतीच्या खासदार सुप्रिया सुळे, जिल्हाधिकारी जितेंद्र डूडी, आमदार विजय शिवतारे, माजी आमदार संजय जगताप, माजी राज्यमंत्री दादा जाधवराव, ग्रामीण पोलीस अधीक्षक संदीपसिंह गिल, विभागीय अधिकारी वर्षा लांडगे आदींनी पालखीचे स्वागत केले.
झेंडेवाडीमध्ये विश्रांती
झेंडेवाडी येथे विश्रांती घेऊन सोहळा सासवडकडे मार्गस्थ झाला. वाटेत दिवे झेंडेवाडी, काळेवाडी, ढुमेवाडी, पवारवाडी येथील ग्रामस्थ यांच्या स्वागताचा स्वीकार करुन पालखी आठ वाजता चंदन टेकडी येथे नगरपालिका हद्दीत दाखल झाली तेव्हा पालिकेच्या अधिकाऱ्यांनी सोहळ्याचे स्वागत केले. रात्री साडेनऊच्या दरम्यान सोहळा पालखी तळावर पोहोचले. त्यानंतर समाजआरती झाली.
रस्त्यांच्या दुतर्फा गर्दी
तालुक्याच्या विविध भागातून मोठ्या संख्येने भाविक रस्त्यांच्या दुतर्फा गर्दी करून पालखी आणण्यासाठी सामील झाले होते. माऊलींचा पालखी सोहळा मंगळवारी जेजुरीकडे प्रस्थान ठेवणार असून, उद्या (दि. 23) संत सोपानदेव व संत चांगावटेश्वर यांच्या पालखी सोहळ्याचे पंढरपूरकडे प्रस्थान होणार आहे. सोहळ्यामुळे अवघी सासवड नगरी माऊलीमय झाली आहे.
