मुंबईतील माटुंगा परिसरात भररस्त्यात चौघांवर तलवारी, चाकू आणि काठ्यांनी हल्ला केल्याची घटना उघडकीस आली आहे. याप्रकरणी सात जणांना ताब्यात घेण्यात आलं आहे. हल्ल्याची संपूर्ण घटना सीसीटीव्हीत कैद झाली आहे. कौटुंबिक वादातून हा हल्ला झाल्याचा अंदाज पोलिसांनी व्यक्त केला आहे. पोलीस याप्रकरणी सखोल तपास करत आहेत.
माटुंगा येथे शनिवारी रात्री आठ ते दहा जणांच्या गटाने तलवारी, चाकू आणि काठ्यांनी भररस्त्यात चौघांवर हल्ला केला. हल्लेखोरांनी आपली ओळख लपवण्यासाठी स्कार्फ आणि हेल्मेटने चेहरे झाकले होते. याप्रकरणी पोलिसांनी आठ जणांविरुद्ध गुन्हा दाखल केला असून सात संशयितांना आधीच ताब्यात घेतले आहे.
हल्ल्यात सहभागी असलेल्या अन्य आरोपींची ओळख पटवण्याचा आणि त्यांना पकडण्याचा पोलीस प्रयत्न करत आहेत. भररस्त्यात झालेल्या या घटनेमुळे कायदा आणि सुव्यवस्थेचा प्रश्न पुन्हा एकदा ऐरणीवर आला आहे.
