सावेडी उपनगरातील गावडे मळा येथील भारती हौसिंग सोसायटीमधील एक बंद घर फोडून चोरट्यांनी 34 तोळे वजनाचे सोन्याचे दागिने व 42 हजार रुपयांची रोकड असा सुमारे सव्वासात लाख रुपयांचा ऐवज लंपास केला. या प्रकरणी तोफखाना पोलिस स्टेशनला अज्ञात चोरट्यांविरुद्ध घरफोडीचा गुन्हा नोंदविण्यात आला आहे.
नगरमधील सोहम टेलिकॉम कंपनीतील मॅनेजिंग डायरेक्टर असलेले अमित बुरा यांच्या घरी ही चोरी झाली असून, मंगळवारी मध्यरात्री त्यांनी फिर्याद नोंदविली आहे. एका नातेवाईकांचे निधन झाल्याने बुरा हे कुटुंबासह पुणे येथे गेले होते. 30 ते 31 डिसेंबर दरम्यान त्यांचे घर बंद होते. 31 डिसेंबरला दुपारी एका मित्राला त्यांचे ब्लेझर हवे होते. हे ब्लेजर देण्यासाठी त्यांच्या एका ओळखीच्या व्यक्तीने घर उघडले होते. त्यावेळी घरात चोरी झाल्याचे उघडकीस आले. घर उघडणार्‍या व्यक्तीने बुरा यांना फोन करून याबाबतची माहिती दिली. बुरा यांनी मंगळवारी सायंकाळी घरी येऊन पाहणी केली. घरातील दोन रुममधील लोखंडी कपाटे उघडून त्यातील दागिने व रोख रक्कम चोरीला गेली होती. किचनचा दरवाजा उघडा होता. किचनचा दरवाजा उघडून चोरट्यांनी घरात येऊन चोरी केल्याचा संशय आहे. त्यानंतर तोफखाना पोलिस स्टेशनचे पोलिस अधिकारी व कर्मचार्‍यांनी घटनास्थळी जाऊन पाहणी केली. घराच्या कपाटातील 42 हजार रुपये, नेकलेस, मोठा हार, झुमके, गोल्ड चैन, रिंग, टॉप्स, अंगठी, पेंडल असे सोन्याचे तब्बल 34 तोळे वजनाचे सोन्याचे दागिने चोरीला गेल्याचे फिर्यादीत म्हटले आहे. दरम्यान, पोलीस या अज्ञात चोरट्यांचा शोध घेत आहेत.
