पंढरपूर येथील नवीन कुंभार गल्लीत राहणाऱ्या माय-लेकराचा कोयत्याने वार करून खून केल्याची घटना मंगळवारी (दि. 15) रात्री 9.30 वाजण्याच्या सुमारास घडली. सुरेखा संजय जगताप (वय – 60), लखन संजय जगताप (वय – 24) अशी मयतांची नावे आहेत.
संजय हे भाजी विक्रीचा व्यवसाय करतात. घटनेच्या दिवशी मंगळवारी सायंकाळी साडेसात वाजता त्यांचा पत्नीशी फोनवरून संवाद झाला होता. नेहमीप्रमाणे ते मंगळवारी रात्री साडेनऊच्या सुमारास घरी परतले, तेव्हा घराला बाहेरून कडी लावलेली होती. घर उघडून आत जाताच त्यांना मुलगा लखन आणि पत्नी सुरेखा हे रक्ताच्या थारोळ्यात पडल्याचे दिसले. लखन हा डिलिव्हरी बॉ य म्हणून काम करत होता, तर सुरेखा या गृहिणी होत्या.
माहिती मिळताच पोलीस घटनास्थळी दाखल झाले. पोलिसांनी सीसीटीव्ही फुटेजची तपासणी सुरू केली आहे. तसेच फॉरेन्सिक टीम व श्वान पथकाकडून घटनास्थळाची पाहणी करण्यात आली. मारेकऱ्यांचा शोध घेण्यासाठी पोलीस पथके रवाना झाल्याचे पोलीस निरीक्षक विश्वजित घोडके यांनी सांगितले.
