नेरुळ येथील सेक्टर ३० मधील महापालिका शाळेतील वर्गाच्या छताचे प्लास्टर कोसळून शिक्षिका जखमी झाल्याची घटना आज सकाळी घडली. यावेळी वर्गात इयत्ता सहावीचे विद्यार्थी बसले होते. मात्र दैव बलवत्तर असल्याने हे सर्वच विद्यार्थी बालबाल बचावले. विशेष म्हणजे महापालिका प्रशासनाने सुमारे आठ कोटी रुपये खर्चुन बांधलेल्या या इमारतीत चालू शैक्षणिक वर्षापासून वर्ग भरवण्यास सुरुवात करण्यात आली आहे. शाळा सुरू होऊन चार दिवस उलटले नाही तोच हा प्रकार घडल्याने पालकांमध्ये घबराट पसरली असून पालिकेचा बांधकाम विभाग वादाच्या भोवऱ्यात सापडला आहे.
नेरुळ येथील सेक्टर ३० मधील भूखंड क्रमांक ८ ‘अ’ वर नवी मुंबई महापालिका प्रशासनाने सुमारे आठ कोटी रुपये खर्चुन शाळेची इमारत उभी केली आहे. या इमारतीचे बांधकाम याच वर्षी पूर्ण झाल्यामुळे १६ जूनपासून येथे शाळेचे वर्ग भरवण्यास सुरुवात करण्यात आली आहे. आज सकाळी साडेदहाच्या सुमारास पहिल्या मजल्यावरील सहावी ‘क’च्या वर्गात अचानक छताचे प्लास्टर दोन ठिकाणी कोसळले. त्यावेळी वर्गात ३६ विद्यार्थी बसलेले होते. या दुर्घटनेत वर्गातील शिक्षिका जखमी झाल्या. मात्र दैव बलवत्तर असल्याने सर्वच ३६ विद्यार्थी बालबाल बचावले. या घटनेची माहिती मिळाल्यानंतर शाळा व्यवस्थापन आणि अन्य शिक्षकांनी सहावी ‘क’च्या वर्गाकडे धाव घेतली आणि सर्व विद्यार्थ्यांना वर्गाबाहेर काढले. जखमी झालेल्या शिक्षिकेला तातडीने नजीकच्या रुग्णालयात दाखल करण्यात आले.
ठेकेदारावर कडक कारवाई करा
निकृष्ट बांधकामामुळे या शाळेची अवस्था उद्घाटनानंतर काही महिन्यात दयनीय झाली आहे. नवीन बांधकामाला ठिकठिकाणी तडे गेले आहेत. विद्यार्थ्यांच्या सुरक्षेसाठी शाळेत सीसीटीव्ही यंत्रणा बसविण्यात आलेली नाही. याप्रकरणी संबंधित अधिकारी, ठेकेदारावर कडक कारवाई करण्यात यावी. ठेकेदाराला काळ्या यादीत टाकावे अशी मागणी शिवसेना (उद्धव बाळासाहेब ठाकरे) उपशहरप्रमुख समीर बागवान यांनी महापालिका आयुक्त डॉ. कैलास शिंदे यांच्याकडे केली आहे. याप्रसंगी उपजिल्हाप्रमुख सुमित्र कडू उपस्थित होते.
