संगीतकार, गायक व लोकप्रिय संगीत दिग्दर्शक श्रीधर फडके यांच्या अमृत महोत्सवी वर्षानिमित्त त्यांच्या समृद्ध संगीत प्रवासाला वाहिलेला ‘झाले मोकळे आकाश…’ हा एक आगळावेगळा सांगीतिक कार्यक्रम आयोजित करण्यात आला आहे. हा कार्यक्रम त्यांच्या 75 व्या वाढदिवसानिमित्त मंगळवार, 9 सप्टेंबर रोजी सायंकाळी 6.30 वाजता विलेपार्ले येथील दीनानाथ मंगेशकर नाटय़गृहात रंगणार आहे. यानिमित्ताने श्रीधर फडके यांच्या सांगीतिक प्रवासाचा आढावा घेणारे ‘अमृताच्या जणू ओंजळी’ हे सुकन्या जोशी यांनी शब्दांकन केलेले पुस्तक डिंपल प्रकाशनतर्फे प्रकाशित होणार आहे.
व्हॅल्युएबल ग्रुप प्रस्तुत, जीवनगाणी व स्वरगंधारतर्फे हा कार्यक्रम आयोजित करण्यात आला आहे. यानिमित्ताने ऋषिकेश रानडे, सोनाली कर्णिक, अभिषेक नलावडे, धनश्री देशपांडे, शिल्पा पुणतांबेकर यांसारखे लोकप्रिय गायक श्रीधर फडके यांच्या रचनांना आवाज देतील. या वेळी श्रीधरजी फडके यांची मुलाखत होणार असून ते काही निवडक गाणीही सादर करणार आहेत. निवेदन विघ्नेश जोशी यांचे, तर संगीत संयोजन प्रशांत लळीत यांचे आहे. कार्यक्रमाचे संयोजन प्रसाद महाडकर आणि मंदार कर्णिक यांचे असून सूत्रसंचालन स्मिता गवाणकर करणार आहे. या कार्यक्रमाचे प्रमुख पाहुणे सांस्कृतिक कार्य मंत्री आशीष शेलार असणार आहेत. याशिवाय सुरेश वाडकर, उत्तरा केळकर, रवींद्र साठे, अनुराधा पौडवाल, पद्मजा फेणाणी-जोगळेकर यांचीही उपस्थिती असणार आहे. प्रवेश विनामूल्य असून प्रवेशिका शनिवारपासून उपलब्ध होतील.
