सीरिया सरकारने महिला आणि पुरुष या दोघांसाठी एक नवीन ड्रेसकोड लागू केला आहे. नव्या ड्रेसकोडनुसार, महिलांना समुद्रकिनारी जायचे असेल तर पूर्ण कपडे घालणे बंधनकारक आहे, तर पुरुषसुद्धा समुद्रकिनारी शर्टलेस होऊ शकणार नाहीत. त्यांनासुद्धा कपडे घालणे बंधनकारक करण्यात आले आहे. माजी राष्ट्राध्यक्ष बशर अल-असद यांच्या बंडानंतर सीरियामध्ये सत्तेवर आलेल्या अहमद अल-शारा यांच्या सरकारने देशात सांस्पृतिक बदल घडवून आणण्याचा निर्णय घेतला आहे. लोकांचे हित लक्षात घेऊन हा निर्णय घेण्यात आला आहे, असे पर्यटनमंत्री माझेन अल-सलहानी यांनी फेसबुकवरील पोस्टमध्ये म्हटले आहे. पुरुषांना सार्वजनिक ठिकाणी शर्टलेस जाण्यास मनाई करण्यात आली आहे, परंतु स्विमिंग एरिया, हॉटेल लॉबी आणि फूड सर्व्हिस एरियाच्या बाबतीत शिथिलता देण्यात आली आहे. समुद्रकिनारी आणि स्विमिंग पूल क्षेत्राबाहेर, सार्वजनिक ठिकाणी खांदे व गुडघे झाकणारे सैल कपडे घालणे चांगले. पारदर्शक किंवा खूप घट्ट कपडे घालणे टाळा, असे या आदेशात म्हटले आहे.
