इलेक्ट्रिक वाहनांना पूर्ण टोलमाफी जाहीर करणाऱ्या शासन निर्णयाची (जीआर) लवकरच प्रत्यक्ष अंमलबजावणी केली जाणार आहे. जीआर काढून अनेक दिवस उलटले तरी मुंबई-पुणे एक्स्प्रेस वेवर इलेक्ट्रिक वाहनांकडून टोलवसुली सुरू असल्याचे वृत्त दै. ‘सामना’ने 31 मे रोजीच्या अंकात ‘महायुती सरकारची ‘टोल’वाटोलवी, फसवाफसवी’ या मथळय़ाखाली प्रसिद्ध केले. त्या वृत्ताच्या दणक्यानंतर महाराष्ट्र राज्य रस्ते विकास महामंडळाने टोलमाफी प्रणाली लवकरात लवकर कार्यान्वित करण्यासाठी कार्यवाहीला वेग दिला आहे.
सरकारने मुंबई-पुणे एक्स्प्रेस वे, समृद्धी महामार्ग आणि शिवडी-न्हावा शेवा अटल सेतूवर प्रवासी इलेक्ट्रिक वाहनांना पूर्ण टोलमाफी देणारा जीआर 23 मे रोजी जारी केला. त्यानुसार इलेक्ट्रिक वाहनांना तिन्ही मार्गांवर तातडीने पूर्ण टोलमाफी देणे अपेक्षित आहे. असे असताना अनेक टोलनाक्यांवर अद्याप इलेक्ट्रिक वाहनांकडून बिनदिक्कतपणे टोलवसुली केली जात आहे.
विविध प्राधिकरणांची तातडीने बोलावली बैठक
इलेक्ट्रिक वाहनांकडून टोलच्या माध्यमातून लूट सुरूच असल्याचे वृत्त प्रसिद्ध झाल्यानंतर तातडीने विविध प्राधिकरणांची बैठक बोलवण्यात आली. परिवहन आयुक्तांच्या अध्यक्षतेखाली पार पडलेल्या बैठकीत महाराष्ट्र राज्य रस्ते विकास महामंडळ, मुंबई महानगर प्रदेश विकास प्राधिकरणचे अधिकारी, एनपीसीआयचे प्रतिनिधी, सिस्टम इंटिग्रेटर, बँकेचे प्रतिनिधी उपस्थित होते. तसेच महामार्ग प्राधिकरणासोबत बैठक घेऊन टोलमाफी प्रणाली लवकरात लवकर कार्यान्वित करण्याबाबत चर्चा करण्यात आली.
