मूर्ती छोटी, पण किर्ती महान. अवघ्या सव्वा पाच फूट उंचीच्या यूजी फिटनेसच्या उमेश गुप्ताने संतोष भरणकर आणि उबेद पटेल या आपल्यापेक्षा वजनदार असलेल्या शरीरसौष्ठवपटूंवर मात करत स्पार्टन न्यूट्रिशन्स मुंबई श्रीवर आपल्या नावाची मोहोर उमटवली. परब फिटनेसचा भरणकर उपविजेता तर पटेलने तिसरे स्थान संपादले. महिलांच्या फिजीक स्पोर्ट्समध्ये सुनंदा सातुले तर शरीरसौष्ठवात रेखा शिंदेने बाजी मारली. पुरुषांच्या फिजीक स्पोर्ट्स प्रकारात रोहन भोसले आणि कौस्तुभ हडकर यांनी अव्वल स्थान पटकावले.
चॅम्पियन ऑफ चॅम्पियन्ससाठी स्टेजवर आठही गटविजेते उतरले तेव्हा सर्वांचा नजरा उबेद पटेल आणि संतोष भरणकरकडे वळल्या होत्या. या दोघांपुढे उंचीने कमी असलेला उमेश गुप्ता पीळदार वाटत होता. त्याची उंची, त्याच्या स्नायूंचे आकारमान निश्चित कमी होते, पण त्याच्या आखीवरेखीवपणा आणि पीळदारपणाने त्याला मुंबईच्या शरीरसौष्ठवाचे ऑस्कर जिंकून दिले. गेल्यावर्षी प्रथमच उमेश स्पर्धेत उतरला होता आणि तो टॉप थ्रीमध्ये बसला होता आणि त्याने यावेळी मुंबई शरीरसौष्ठवात आपली ताकद दाखवली. स्पर्धा जिल्हा पातळीवर असली तरी सव्वाशे पुरुष शरीरसौष्ठवपटूंसह फिजीक स्पोर्ट्सचे 55 स्पर्धक आणि महिलांच्या गटातील 20 पीळदार सौंदर्यवती असे एकंदर 200 स्पर्धकांनी मंचावर उतरून मुंबईची ताकद अवघ्या महाराष्ट्राला दाखवली.
आज पुन्हा एकदा मुंबई उपनगर आणि बृहन्मुंबई शरीरसौष्ठव संघटनेने शरीरसौष्ठवात आपलीच ताकद आहे आणि आपलीच चालते हे दाखवून दिले. या दिमाखदार स्पर्धेचा पुरस्कार सोहळा शरीरसौष्ठव संघटनेचे अध्यक्ष अजय खानविलकर, किट्टी फणसेका, सरचिटणीस राजेश सावंत, विशाल परब, राज्य शरीरसौष्ठवाचे कोषाध्यक्ष सुनिल शेगडे, अब्दुल मुकादम ,विजय झगडे आणि स्पर्धेचे पुरस्कर्ते ऋषभ चोक्सी यांच्या उपस्थितीत पार पडला.
माझे जेतेपद मनीष सरांना अर्पण
मी शरीरसौष्ठवात जो काही आहे तो फक्त मनीष सरांच्या (मनीष आडविलकर) मार्गदर्शनामुळे. त्यांनी केलेल्या मार्गदर्शनामुळेच मला मुंबई श्रीचे जेतेपद पटकावते आले आहे. तसेच माझ्या पाठीशी सदैव माझी संघटनाही खंबीरपणे उभी राहिलीय. त्यामुळे माझ्या यशाचे श्रेय मी या दोघांनाच देईन. मी मुंबई श्री चे जेतेपद सरांना अर्पण करत असल्याचेही विजेता उमेश गुप्ता म्हणाला.
महिलांमध्ये रेखा शिंदे, सुनंदा सातुले अव्वल
अलिकडच्या काळात महिला व्यायामाकडे वळू लागल्याने त्यांच्यासाठी घेतल्या जाणार्‍या स्पर्धा महिला वर्गाला प्रेरणादायी ठरु लागल्या आहेत. प्रेक्षकांमध्ये महिलांचे वाढते प्रमाण आणि प्रत्यक्ष सहभाग लक्षणीय ठरत आहे. महिलांच्या शरीरसौष्ठवामध्ये रेखा शिंदे (हर्क्युलस फिटनेस) हिने आपले वर्चस्व राखताना सुनंदा सातुलेला मागे टाकले. महिलांच्या शरीरसौष्ठवात सुनंदाला अपयश आले असले तरी तिने फिजीक स्पोर्ट्समध्ये अव्वल स्थान पटकावले. सुनंदाने दोन्ही गटात सहभाग घेतला होता.
स्पार्टन न्यूट्रिशन्स मुंबई श्री स्पर्धेचा निकाल
55 किलो वजनी गट : 1. अक्षय गव्हाणे (पॉवर फिटनेस), 2. ओमकार साईम (आर.एम.भट्ट जिम), 3. ओमकार भानसे (शिवाजी जिम);
60 किलो : 1. रोशन पाष्टे (बॉडी वर्कशॉप), 2. रोहन भोसले (परब फिटनेस) 3. प्रशांत घोलम (एबीएस);
65 किलो : 1.संकेत भरम (परब फिटनेस), 2. अनिल जैसवाल (सोमय्या कॉलेज), 3. दर्शन सणस (जय भवानी);
70 किलो : 1.उमेश गुप्ता (युजी फिटनेस), 2. अमेय नेवगे (फिट अँड फाईन), 3.विलास घडवले (बॉडी वर्कशॉप) ; 75 किलो : 1.संतोष भरणकर (परब फिटनेस) 2.विशाल धावडे (बालमित्र जिम), 3. गणेश उपाध्याय (बालमित्र जिम); 80 किलो : 1.अक्षय खोत (परब फिटनेस), 2. विशाल गिजे (बालमित्र जिम), 3. राजेंद्र जाधव (कल्ट फिट जिम);
85 किलो : 1. विजेंद्र ठसाळे (फिटनेस पॉईंट), 2. अमित साटम (माँसाहेब जिम), 3. प्रणव खातू (यंग दत्ताराम);
85 किलोवरील : 1. ऊबेद पटेल (विकी जिम), 2. सुमित गुरव (स्टील बॉडी), 3. प्रथमेश तोडणकर (स्वामी समर्थ),स्पार्टन न्यूट्रिशन्स मुंबई श्री विजेता : उमेश गुप्ता उपविजेता : संतोष भरणकर, द्वितीय उपविजेता : उबेद पटेल
फिजिक्स स्पोर्ट्स (महिला ): 1. सुनंदा सातुले (डी फिटनेस), 2. पुनम शिंदे -कोकणे (फिटनेस हाऊस), 3. ग्रंथालिया हांडे (फाइव स्टार); महिला शरीरसौष्ठव : 1. रेखा शिंदे (हर्क्युलस फिटनेस), 2.सुनंदा सातुले (बी फिटनेस), 3.शर्वरी गोडसे (फाईव्ह स्टार).
