CAA हा रौलट कायद्यासारखा काळा कायदा, उर्मिला मातोंडकर यांची वादात उडी

बातमी शेअर करा :
सामना फॉलो करा
urmila-matondkar

नागरिकत्व सुधारित कायद्यावरून (CAA) देशात दोन पडल्यासारखी स्थिती आहे. काही जण CAA च्या समर्थनात मोर्च काढत आहेत तर काही जणांनी या सुधारित कायद्याला कडाडून विरोध करत आंदोलन छेडले आहे. राजकारण, चित्रपट सृष्टी, उद्योगपती यांच्यातही असे दोन तट पडल्याचे चित्र पाहायला मिळत आहे. बॉलीवूडच्या कलाकार देखील आपली भूमिका मांडताना पाहायला मिळाले आहेत. आता बॉलीवूडमधून राजकारणात उतरलेल्या उर्मिला मातोंडकर यांनी देखील CAA संदर्भात भूमिका मांडली आहे. त्यांनी नागरिकत्व सुधारित कायदा 2019 ची तुलना थेट स्वातंत्र्यपूर्व काळात ब्रिटीशांनी आणलेल्या रौलट कायद्याशी केली आहे. त्यामुळे आता हा वाद आणखी चिघळणार आहे.

एएनआयच्या वृत्तानुसार, ‘उर्मिला मातोंडकर म्हणाल्या की, 1919 मध्ये महायुद्ध संपल्यानंतर हिंदुस्थानात आपल्या विरोधात असंतोष निर्माण झाला असून महायुद्ध संपल्यानंतर तो आणखी वाढेल असे ब्रिटीशांच्या लक्षात आले. तो असंतोष रोखण्यासाठी त्यांनी रौलट कायदा आणला. 1919 मधील रौलट कायदा आणि नागरिकत्व सुधारित कायदा 2019 या दोन्ही कायद्यांची इतिहासात काळे कायदे म्हणून नोंद केली जाईल’.

उर्मिला मातोंडकर यांनी भूमिका घेतल्यानंतर दोन्ही बाजूने प्रतिक्रिया येण्यास सुरुवात झाली आहे. CAA विरोधातील आंदोलकांनी मातोंडकरांच्या या भूमिकेचं स्वागत केले आहे. तर CAA समर्थकांनी त्यांच्याविरोधात टीकेची झोड उठवली आहे.

विधान करताना उर्मिला यांच्याकडून झाली चूक

उर्मिला मातोंडकर यांनी CAA वर कडाडून टीका करत त्याला काळा कायदा तर म्हटलेच आहे, तसेच ब्रिटीशांच्या रौलट कायदाशी त्याची तुलना केली आहे. मात्र त्यांची भूमिका मांडत असताना त्यांनी महायुद्धाचे नाव चुकवले आहे. 1919 मध्ये पहिले महायुद्ध संपले होते, मात्र उर्मिला यांनी दुसरे महायुद्ध असा उल्लेख केला आहे. त्यांच्या या चुकीमुळे नेटकऱ्यांनी झापले आहे.

एका युझरने म्हटले आहे की, ओ छम्मा छम्मा दुसरे महायुद्ध 1939 ते 1945 चालले होते. तुमचे बॉलीवूड ज्ञान तुमच्याजवळच ठेवा.

तर हर्षिल मेहता या युझरने इतिहास कुठे शिकलात? बॉलीवूडमध्ये? असा सवाल केला आहे.

काय होता रौलट कायदा?

पहिले महायुद्ध सुरू असताना ब्रिटीश सरकार त्यामध्ये गुंतले होते. त्याचाच फायदा घेत तत्कालीन हिंदुस्थानी नेत्यांनी ब्रिटीशांविरोधातील असंतोष वाढवला. ब्रिटीश सरकारची त्यामुळे चांगलीच कोंडी झाली. देशभरात ब्रिटीश सरकारविरोधात आंदोलनांनी जोर धरला. लोक रस्त्यावर उतरली. त्यामुळे ब्रिटीश सरकारच्या मनात धडकी भरली होती. अखेर हिंदुस्थानी जनतेचा असंतोष दडपून टाकण्यासाठी त्यांनी सिडनी रौलट याच्या अध्यक्षतेखाली एक समिती नेमली आणि प्रचंड विरोध असताना देखील 1919 मध्ये रौलट कायदा लागू केला. या कायद्यामुळे ब्रिटीश सरकारला राक्षसी ताकद दिली. या कायद्यानुसार कोणत्याही हिंदुस्थानी नागरिकाला न्यायालयात खटला न चालवता तुरुंगात टाकण्याचा अधिकार होता. तसेच अपराध्याला त्याच्याविरोधात कुणी तक्रार केली आहे त्याचे नाव जाणून घेण्याचा देखील अधिकार नाकारण्यात आला होता. त्यानंतर या कायद्याचा निषेध करण्यासाठी देशव्यापी आंदोलन, मोर्चे झाले होते. ‘जालियन बाग’ हत्याकांड हे त्याच वेळी जनरल डायरने घडवून आणले होते.

दरम्यान, CAA च्या विरोधात बॉलीवूड सेलिब्रिटी दीपिका पडुकोण, फराहन अख्तर, अनुराग कश्यप, जावेद जाफरी यांनी आवाज उठवला होता. आता उर्मिला मातोंडकर यांनी देखील या वादात उडी घेतली आहे.