उत्तर प्रदेशातील मुरादाबादमध्ये धक्कादायक घटना उघडकीस आली आहे. मालमत्तेच्या हव्यासातून महिलेने प्रियकराच्या साथीने पतीची निर्घृण हत्या केली. हत्येनंतर पतीचा मृतदेह गाडीत टाकला आणि त्या गाडीतून दोन दिवस प्रियकरासोबत फिरत राहिली. अखेर दोन दिवसांनी कोटद्वारच्या जंगलात मृतदेह फेकून दिल्याची माहिती समोर आली आहे. याप्रकरणी पोलिसांनी महिलेसह तिच्या प्रियकराला अटक केली असून दोघांची तुरुंगात रवानगी झाली आहे.
मुरादाबाद शहरातील नगीना येथे घटना घडली. सिव्हिल लाईन्स पोलिस ठाण्यातील अधिकाऱ्यांनी दिलेल्या माहितीनुसार, हत्या झालेला रवींद्र कुमार पत्नी रीनासोबत रामगंगा विहार कॉलनीत राहत होता. रीना फिजिओथेरपिस्ट असून तिचे बिजनोर नगीना येथील परितोष नावाच्या तरुणावर प्रेम होते. रविंद्र कुमारला रामगंगा विहार येथील घर विकायचे होते. हा आपल्या प्रेमात दुरावा करण्याचा प्रयत्न असल्याच्या संशयातून रीनाने प्रियकराच्या साथीने रविंद्र कुमारच्या हत्येचा प्लान आखला होता. रीना व तिच्या प्रियकराने कट रचून 31 मे रोजी रविंद्र कुमारची हत्या केल्याचे उघडकीस आले आहे.
पोलिसांनी सांगितले की, रीना व तिच्या प्रियकराने 31 मे रोजी नगीना येथील परितोषच्या घरी रविंद्र कुमारची हत्या केली. रीनाने सुरुवातीला पतीला दारू पाजली. मग तिने त्याच्या मानेवर आणि छातीवर फावड्याने हल्ला केला. त्यात रविंद्र कुमारचा मृत्यू झाला. नंतर रीना व तिचा प्रियकर परितोष दोघांनी मिळून गाडीत मृतदेह टाकला आणि उत्तराखंडमधील रामनगरच्या जंगलात मृतदेह फेकण्याचा प्लान रचला. पण रामनगरच्या जंगलात संधी न मिळाल्याने ते कोटद्वारला आले आणि तेथील जंगलात मृतदेह फेकला. तो मृतदेह 5 जून रोजी आढळून आला. त्याचा अधिक तपास केल्यानंतर पोलिसांनी रवींद्र कुमारची ओळख पटवली होती.
