कामाचे मुल्यांकन करून बिल मंजूरीचा प्रस्ताव वरिष्ठ कार्यालयाला पाठवण्याकरीता 50 हजार रुपयांची लाच घेताना रत्नागिरी जिल्हा परिषदेचा कनिष्ठ अभियंता लाच लुचपत प्रतिबंधक विभागाच्या जाळ्यात सापडला आहे. तक्रारदारांनी केलेल्या कामाचे मुल्यांकन करून बिल मंजूरीचा प्रस्ताव वरिष्ठ कार्यालयाला सादर करण्यासाठी रत्नागिरी जिल्हा परिषदेच्या राष्ट्रीय आरोग्य अभियानातील कनिष्ठ अभियंता चंद्रकांत गणपत गमरे (वय 42) याने तक्रारदाराकडे 60 ते 70 हजार रुपयांची मागणी केली होती.
तडजोडीअखेर 50 हजार रुपये देण्याचे निश्चित झाले. त्यानंतर लाच लुचपत प्रतिबंधक विभागाने सापळा रचला. सोमवारी दुपारी 1.45 वाजण्याच्या सुमारास खेड तालुक्यातील गणेशनगर भरणे येथे चंद्रकांत गमरे याला 50 हजार रुपयांची लाच घेताना लाच लुचपत प्रतिबंधक विभागाच्या पथकाने रंगेहात पकडले. ही कारवाई पोलीस उपअधिक्षक सुशांत चव्हाण यांच्या मार्गदर्शनाखाली पोलीस निरिक्षक प्रवीण ताटे, सहाय्यक पोलीस फौजदार संदीप ओगले, संतोष कोळेकर, विशाल नलावडे, योगेश हुंबरे, हेमंत पवार, राजेश गावकर यांनी केली.