एका नातवाने आपल्या आजीला आरे कॉलनीतील कचऱ्याच्या ढिगाऱ्यात टाकून पोबारा केला आहे. या आजींची तब्येत इतकी खालावलेली होती की त्यांना धड उठून उभंही राहता येत नव्हतं. घटनेची माहिती मिळताच पोलिसांनी या आजीला रुग्णालयात दाखल केले असून त्यांच्यावर उपचार सुरु आहेत.
मिड डे या इंग्रजी दैनिकाने याबाबत वृत्त दिले आहे. आरे कॉलनीच्या एका कचऱ्याच्या ढिगाऱ्यात एक सत्तरीच्या घरातील महिला कण्हत होती. तिथल्या नागिरिकांनी या महिलेकडे पाहिल्यानंतर त्यांची भितीने गाळण उडाली. त्यांनी तातडीने याबाबत पोलिसांनी कळवले. तेव्हा पोलिसांनी घटनास्थळी धाव घेतली. पोलिसांना आरे कॉलनीच्या या कचऱ्याच्या ढिगाऱ्यात एक महिला मरणासन्न अवस्थेत आढळली. या महिलेच्या नाकाला संसर्ग झाला होता आणि हा संसर्ग तिच्या संपूर्ण चेहऱ्यावर पसरला होता.
पोलिसांनी आधी या महिलेला पोलीस व्हॅनमधूनच जोगेश्वरीच्या ट्रॉमा केअर रुग्णालयात नेले. रुग्णालयाने त्यांना दाखल करून घेण्यास नकार दिला. त्यानंत पोलिसांनी या महिलेला कूपर रुग्णालयात नेले. तिथेही फक्त तपासून कूपर रुग्णालयाने त्यांना दुसरीकडे नेण्यास सांगितले.
महिलेची तब्येत अधिक खालावत चालली होती, तरीही कोणतेही हॉस्पिटल तिला दाखल करून घेत नव्हते. अखेर आठ तासांनी, संध्याकाळी साडेपाचच्या सुमारास कूपर हॉस्पिटलने या महिलेला दाखल करून घेतले आणि उपचार सुरू केले.
ती महिला अत्यवस्थ अवस्थेत बोलताना म्हणाली की तिचं नाव यशोदा गायकवाड आहे. ती मालाडमध्ये नातवासोबत राहत होती. तिच्याच नातवाने तिला आर्य कॉलनीत आणून कचऱ्याजवळ सोडून दिल्याचा आरोप तिने केला.
उपचारानंतर या महिलेना आपले नाव यशोदा गायकवाड असल्याचे सांगितले. तसेच आपण मालाडमध्ये आपल्या नातेवाईकासोबत राहत असल्याची माहिती दिली. आपल्याच नातवाने कचऱ्याच्या ढिगाऱ्यात टाकल्याचं या महिलेने सांगितले.
गायकवाड यांनी मालडचा आणि कांदिवलीचे दोन पत्ते दिले जिथे त्या आधी राहत होत्या. पोलिसांनी दोन्ही ठिकाणी जाऊन तपास केला. पण याबाबत काही माहिती मिळाली नाही. पोलीस याबाबत अधिक तपास करून गायकवाड यांच्या नातेवाईकांचा शोध घेत आहेत.
