जयसिंगपूर – संचारबंदीचा भंग करणार्‍यांविरोधात कारवाई सुरू

बातमी शेअर करा :
सामना फॉलो करा

सोशल डिस्टन्स्टिंगच्या गांभीर्याने शिरोळ तालुक्यात कडकडीत बंद पाळण्यात येत आहे. तरीही विनाकारण फिरणार्‍यांना, होम क्वारंटाईनचा शिक्का असतानाही सार्वजनिक ठिकाणी जाणार्‍यांना ताब्यात घेण्यासाठीची कठोर कारवाई पोलिसांकडून मंगळवारपासून सुरू करण्यात आली आहे.

वडगांव आणि इस्लामपूरच्या कोरोनाग्रस्तांच्या संपर्कात आलेल्या कुरुंदवाड येथील कुटुंबातील सर्व सहाजणांचे वैद्यकीय अहवाल अखेर निगेटिव्ह आल्याने त्यांना कोरोनाची लागण नसल्याचे स्पष्ट झाले. दोन दिवसांपूर्वी तपासणीसाठी त्यांना कोल्हापूर येथील छत्रपती प्रमिलाराजे रुग्णालयात नेण्यात आले होते. त्यामुळे कुरुंदवाडमध्ये घबराटीचे वातावरण होते. मात्र, ते कोरोनाबाधित नसल्याचे स्पष्ट झाल्याने नागरिकांनी सुटकेचा निःश्‍वास सोडला.

कुरुंदवाड येथील एका कुटुंबातील व्यक्तींचा इस्लामपूर येथील कोरोनाबाधित कुटुंबीयांशी संपर्क आल्याने आरोग्य विभागाने त्यांना विलगीकरणाचा शिक्का मारून आरोग्य विभागाच्या नियंत्रणात ठेवले होते. दोन दिवसांपूर्वी त्यांच्या पहिल्या दोन तपासण्यांत दोष आढळला नव्हता. तिसरा अंतिम अहवालही निगेटिव्ह आल्याने या कुटुंबाने सुटकेचा निःश्वास सोडला. तरीही पुढील धोका ओळखून नागरिकांनी घराबाहेर न पडण्याचा निर्धार केला आहे.

चार परप्रांतीय जयसिंगपुरात…
दरम्यान, सोमवारी रात्री उशीरा सांगली जिल्ह्यातील कोरोनाग्रस्त इस्लामपूर शहरातून निघालेल्या चार परप्रांतीयांना अंकली-कोल्हापूर नवीन बायपास रस्त्यावर अडविण्यात आले. हे परप्रांतीय कोल्हापूरच्या दिशेने निघाले होते. पोलिस व काही नगरसेवकांनी त्यांना अडवून चौकशी केली असता ते इस्लामपूरहून पायी निघाल्याचे स्पष्ट झाले. यानंतर पोलिसांना पाचारण करून त्यांना येथील प्राथमिक आरोग्य केंद्रात नेऊन तपासणी करण्यात आली. यानंतर त्यांची मिरज येथील शासकीय रुग्णालयात रवानगी करण्यात आली. तसेच होम क्वारंटाईनचा शिक्का असतानाही जयसिंगपूर येथील खासगी रुग्णालयात नातेवाईकांना भेटण्यासाठी गेलेल्या व्यक्तीलाही पोलिसांनी ताब्यात घेतले.

जयसिंगपुरात आजपासून कारवाई
मंगळवारी पोलिस यंत्रणेने कठोर पाऊल उचलत संचारबंदीतही विनाकारण फिरणार्‍या वाहनधारकांवर कारवाई सुरू केली. प्रशासनाच्या आदेशाचा भंग करीत नागरिकांनी घराबाहेर पडू नये, रस्त्याकडेला गप्पा मारत उभे राहू नये, अन्यथा कायदेशीर कारवाई करण्यात येईल, असा इशारा पोलिस निरीक्षक दत्तात्रय बोरिगिड्डे यांनी दिला आहे. दरम्यान, संचारबंदीचा आदेश असतानाही शासकीय आदेशाचे उल्लंघन केल्याप्रकरणी इम्रान शेख (रा. राजीव गांधीनगर, जयसिंगपूर) याच्यावर जयसिंगपूर पोलिसांनी गुन्हा दाखल केला आहे. नगरपालिका कार्यालयात केवळ कर्मचारी व पत्रकारांनाच प्रवेश असल्याचे पोलिस कर्मचार्‍याने सांगितल्यानंतर आत सोडले नाही, म्हणून त्यांचे व्हिडीओ चित्रीकरण करून सोशल मीडियावर टाकल्याने तसेच शासकीय कामात अडथळा आणल्याने इम्रान शेख याच्यावर ही कारवाई करण्यात आली.