सातारा स्थानिक गुन्हे अन्वेषण विभागाच्या पथकाने धडक कारवाया करून 4 दुचाकी चोरटय़ांना गजाआड केले. 3 दुचाकीही जप्त केल्या. चोरटय़ांनी संबंधित दुचाकी वाठार स्टेशन, सातारा व नऱहे (जि. पुणे) येथून चोरल्या असल्याची कबुली दिली. संशयितांमधील काहीजण रेकॉर्डवरील गुन्हेगार आहेत.
ज्ञानेश्वर विजय जाधव (वय 23, रा. उडतारे, ता. वाई), विजय बाळू जाधव (वय 21, रा. भाडळे, ता. सातारा), अनिकेत अनिल पिसाळ (वय 21), शुभम राजेंद्र आवळे (वय 18, दोघे रा. आकाशवाणी झोपडपट्टी, सातारा) अशी अटक केलेल्या संशयित आरोपींची नावे आहेत.
सातारा स्थानिक गुन्हे अन्वेषण विभागाचे पथक सातारा शहर, कोरेगाव तालुक्यात ठिकठिकाणी गस्त घालत होते. पोलीस पथक विविध गुह्यांच्या अनुषंगाने तपास करत होते. यावेळी सातारा रोड व शहरातील शनिवार पेठ येथे बंदोबस्तावरील पथकाने काही संशयास्पद दुचाकीस्वारांना अडवले. वाहनांची कोणतीही कागदपत्रे नसल्याने पोलिसांनी सखोल माहिती घेतली. यावेळी काही दुचाकी चोरीच्या असल्याचे समोर आले.
स्थानिक गुन्हे अन्वेषण विभागाच्या पोलिसांनी दुचाकी जप्त करून संशयितांना ताब्यात घेतले. दुचाकी चोरीबाबत त्या-त्या पोलीस ठाण्यांकडे चौकशी केली असता, चोरीचे गुन्हे दाखल असल्याचे समोर आले. त्यानुसार पोलिसांनी संशयित आरोपींना अटक करून अधिक चौकशीला सुरुवात केली. संशयितांनी आणखी वाहने चोरली आहेत का, याचा तपास पोलीस करीत आहेत.
जिल्हा पोलीसप्रमुख अजयकुमार बन्सल, अपर पोलीस अधीक्षक अजित बोऱहाडे, पोलीस निरीक्षक किशोर धुमाळ यांच्या मार्गदर्शनाखाली सहायक पोलीस निरीक्षक आनंदसिंग साबळे, फौजदार गणेश वाघ, पोलीस हवालदार संतोष सपकाळ, साबीर मुल्ला, मुनीर मुल्ला, अमित सपकाळ, नीलेश काटकर, शिवाजी भिसे, मोहन पवार, गणेश कापरे, स्वप्नील दौंड, प्रवीण पवार, पंकज बेसके यांनी कारवाईत सहभाग घेतला.
