इस्रायल आणि इराणमधील युद्धामुळे जागतिक स्तरावर चिंतेचे वातावरण निर्माण झाले आहे. त्यामुळे गुंतवणूकदार पुन्हा एकदा सोन्यातील गुंतवणुकीकडे वळल्याने सोन्याच्या दरात प्रचंड वाढ झाली आणि सोन्याच्या दरांनी पुन्हा एकदा उच्चांक गाठला. मात्र, त्यानंतर सोन्याच्या दरात घसरणीला सुरुवात झाली. गेल्या तीन दिवसांत सोन्याच्या किमतींनी नवे विक्रम रचले. मात्र, सोमवारी नवीन उच्चांक गाठल्यानंतर सोन्याच्या किमती अचानक घसरल्या आणि प्रति 10 ग्रॅमसाठी किंमती 1400 रुपयांनी कमी झाल्या.
गेल्या काही दिवसांत सोन्याच्या किमतीत मोठी वाढ झाली आहे. इस्रायल-इराण युद्धाची तीव्रता वाढत असताना सोन्याने नवे उच्चांक गाठण्यास सुरुवात केली. सोमवारी आठवड्याच्या पहिल्याच दिवशी मल्टी कमोडिटी एक्सचेंज (MCX) वर सोन्याचा भाव 1,01,078 रुपये प्रति 10 ग्रॅम या नवीन विक्रमी पातळीवर पोहोचला. मात्र, त्यानंतर त्यात घट झाली आणि तो 1400 रुपयांनी घसरला.
सोमवारी मल्टी कमोडिटी एक्सचेंजमध्ये (MCX गोल्ड रेट) सोन्याच्या किमतीत तेजी दिसून आली आणि 5 ऑगस्ट रोजी संपणाऱ्या सोन्याचा फ्युचर्स भाव 1,01,078 रुपये प्रति 10 ग्रॅमवर पोहोचला, जो त्याचा आतापर्यंतचा उच्चांक आहे. यानंतर, सोन्याच्या किमतीत घसरण सुरू झाली आणि किंमती वेगाने घसरल्या. MCX वर सोन्याचा भाव 1.42 टक्के किंवा 1426 रुपये प्रति 10 ग्रॅमने घसरून 98,850 रुपये प्रति 10 ग्रॅम झाल्या.
सराफा बाजारात 24 कॅरेट 10 ग्रॅम सोन्याचा दर 99,370 रुपये होता. तर 22 कॅरेट सोने 96,990 रुपये प्रति 10 ग्रॅम, 20 कॅरेट सोने 88,440 रुपये प्रति 10 ग्रॅम, 18 कॅरेट सोने 80,490 रुपये प्रति 10 ग्रॅम आणि 14 कॅरेट सोन्याचा दर 64,100 रुपये प्रति 10 ग्रॅम होता.
