नीट सराव परीक्षेत कमी गुण मिळाले म्हणून शिक्षक पित्याने 17 वर्षांच्या मुलीला बेदम मारहाण केली. या मारहाणीत मुलीचा मृत्यू झाला. सांगलीच्या आटपाडी तालुक्यातील नेलकरंजी येथे ही खळबळजनक घटना घडली. याप्रकरणी पोलिसांनी शिक्षक पित्याला अटक केली आहे. धोंडीराम भगवान भोसले असे अटक पित्याचे नाव आहे.
नेलकरंजी राहणारे धोंडीराम भोसले हे याच गावातील माध्यमिक विद्यालयात शिक्षक आहेत. तर त्यांची पत्नी माजी सरपंच आहे. त्यांना एक मुलगा आणि एक मुलगी अशी दोन अपत्ये आहेत. धोंडीराम यांची मुलगी साधना नीट परीक्षेची तयारी करत होती. साधनाला नीट सराव परीक्षेत कमी गुण मिळाल्याने धोंडीराम यांना संताप अनावर झाला आणि यातून झालेल्या वादातून त्यांनी मुलीला बेदम मारहाण केली. या मारहाणीत मुलीचा दुर्दैवी मृत्यू झाला, अशी माहिती ई-सकाळने आपल्या वृत्तात दिली आहे.
घटनेनंतर मुलीच्या आईने पतीविरोधात पोलिसात तक्रार दाखल केली. आईच्या फिर्यादीवरून पोलिसांनी धोंडिराम यांच्याविरोधात गुन्हा दाखल करत त्याला अटक केली आहे. साधना बारावीत शिकत होती. यासोबतच ती नीट परीक्षेचीही तयारी करत होती.
