महाराष्ट्र विधिमंडळाचे पावसाळी अधिवेशन 30 जून ते 18 जुलै या कालावधीत मुंबईत पार पडणार आहे. विधिमंडळ कामकाज सल्लागार समितीच्या बैठकीत हा निर्णय घेण्यात आला. बैठकीत अधिवेशनाच्या नियोजनावर चर्चा करण्यात आली. विधिमंडळाचे सचिव जितेंद्र भोळे यांनी कामकाजाची माहिती दिली.
शेतकरी कर्जमाफी, शक्तीपीठ महामार्ग, समृद्धी महामार्गावरील खड्डे, अतिवृष्टी, लाडकी बहिण योजना, महाराष्ट्राच्या तिजोरीतला खडखडाट अशा अनेक मुद्द्यांवरून विरोधक या अधिवेशनात महायुती सरकारला घेरणार आहेत. त्यामुळे पावसाळी अधिवेशन चांगलेच गाजणार आहे, असे बोलले जात आहे.
मार्च महिन्यात झालेल्या अर्थसंकल्पीय अधिवेशनात लक्षवेधी सूचनांची विक्रमी संख्या झाली. याच अधिवेशनात अजित पवार गटाने नेते धनंजय मुंडे यांना मंत्रिपदाचा राजीनामा द्यावा लागला होता.
