सरकारच्या महत्त्वाच्या फाईल्स चक्क बीअर बारमध्ये नेऊन सह्या केल्याचा नागपूरमधील धक्कादायक प्रकार समोर आला असताना आता नागपूरमधीलच एका लिपिकाने दारूच्या पैशांसाठी ‘जीएसटी’ फाईल्स थेट भंगारात विकल्याने एकच खळबळ उडाली आहे. या प्रकारामुळे सरकारच्या महत्त्वाच्या फाईल्सच्या सुरक्षेबाबत प्रश्नचिन्ह निर्माण झाले आहे.
नागपूरच्या सिव्हिल लाइन्स येथील व्हीसीए स्टेडियमसमोर केंद्रीय वस्तू आणि सेवा कर विभागाचे नागपूर झोनल कार्यालय आहे. याच कार्यालयातील लिपिकाने हा धक्कादायक प्रकार केला आहे. या फाईल्सचे वजन सुमारे 500 किलो होते आणि त्याच्या मोबदल्यात भंगारवाल्याने त्याला पाच हजार रुपये दिल्याची माहिती आहे. मोहित गुंड असे या लिपिकाचे नाव असून त्याची नियुक्ती अनुपंपा तत्त्वावर इंदूर येथील सीजीएसटी कार्यालयात लिपिक म्हणून झाली होती. मात्र, मोहित गुंड नियमितपणे दारू पिऊन कामावर यायचा. शिवाय तो अनेकदा कार्यालयात अनुपस्थित राहायचा. त्यामुळे त्याची बदली नागपुरातील कार्यालयात करण्यात आली होती.
सीसीटीव्हीमुळे प्रकार उघडकीस
या ठिकाणचे सीसीटीव्ही फुटेज तपासण्यात आले असता मोहित गुंड याने महत्त्वाच्या फाईल्स रिक्षामध्ये भरून भंगारवाल्याकडे रद्दीच्या भावाने विकल्याचे स्पष्ट झाले. त्यामुळे पळापळ झालेल्या प्रशासनाने संबंधित भंगारवाल्याला 5 हजार रुपये देऊन सीजीएसटी अधिकाऱ्यांनी त्या सर्व फाईल्स परत मिळविल्या. या प्रकारानंतर मोहित गुंड याला तत्काळ निलंबित करण्यात आले आहे. तसेच फाईल्सच्या सुरक्षिततेबाबत विभागीय स्तरावर गंभीर प्रश्न निर्माण झाल्यामुळे यासंदर्भात अंतर्गत चौकशी सुरू करण्यात आली आहे.
