राखी पौर्णिमेला भावाला बोलविल्यास त्याला जिवे मारण्याची धमकी दिल्यामुळे आणि माहेरहून 20 लाख रुपये आणण्याच्या सासरच्या तगाद्याला पंटाळून उच्चशिक्षित विवाहित तरुणीने गळफास घेऊन आत्महत्या केली. ही घटना 9 ऑगस्टला रात्री अकराच्या सुमारास आंबेगाव बुद्रुक भागात घडली.
शारीरिक आणि मानसिक छळ करून तिला आत्महत्येस प्रवृत्त केल्याच्या आरोपावरून भारती विद्यापीठ पोलिसांनी पतीसह सासरकडील नातेवाईकांविरुद्ध गुन्हा दाखल केला आहे. स्नेहा विशाल झेंडगे (27, रा. आंबेगाव बुद्रुक, कात्रज) असे आत्महत्या केलेल्या विवाहित तरुणीचे नाव आहे. याप्रकरणी पती विशाल झेंडगे, सासरे संजय झेंडगे, सासू विठाबाई झेंडगे, दीर विनायक झेंडगे, नणंद तेजश्री थिटे यांच्यासह 7 जणांविरुद्ध गुन्हा दाखल केला. कैलास मच्छिंद्र सावंत (55, रा. कर्देहळी, जि. सोलापूर) यांनी भारती विद्यापीठ पोलीस ठाण्यात फिर्याद दिली आहे.
