पहिल्या एकदिवसीय सामन्यात न्यूझीलंडने इंग्लंडवर 4 विकेट राखून मात करत तीन सामन्यांच्या मालिकेत 1-0 अशी आघाडी घेतली. डगआऊटमधून इंग्लंडचा निःशब्द चेहरा आणि मैदानावर न्यूझीलंडचा उत्सव, या चित्राने सामन्याची कहाणी सांगून टाकली.
नाणेफेक जिंकून प्रथम फलंदाजीसाठी पाठवलेल्या इंग्लंडची सुरुवात अत्यंत दयनीय ठरली. न्यूझीलंडच्या भेदक गोलंदाजीपुढे इंग्लंडचे फलंदाज अक्षरशः गारठले. अवघ्या 56 धावांवर त्यांचे सहा फलंदाज तंबूत परतले होते आणि धावफलकावर निराशाजनक दृश्य दिसत होते.
अशा संकटाच्या क्षणी हॅरी ब्रुकने ‘एकलव्यासारखी झुंज’ देत इंग्लंडचा डाव वाचवला. त्याने 101 चेंडूंत 9 चौकार आणि तब्बल 11 षटकारांच्या मदतीने 135 धावांची विस्मयकारक खेळी साकारली.
त्याला जेमी ओव्हरटनने 54 चेंडूंत 46 धावांची झुंज देत साथ दिली. या दोघांच्या भागीदारीमुळे इंग्लंडने 200 धावांचा टप्पा गाठला आणि संघर्षाचा धागा पुन्हा जोडला. न्यूझीलंडकडून झॅकरी फाऊलक्स सर्वाधिक प्रभावी ठरला. त्याने 7 षटकांत 41 धावा देत 4 विकेट टिपले, तर जेकब डफी (3/55) आणि मॅट हेन्री (2/53) यांनी योग्य साथ दिली.
इंग्लंडने दिलेले 224 धावांचे आव्हान पाहता न्यूझीलंडचा विजय सहज वाटत होता, पण त्यांची सुरुवात मात्र डळमळीत झाली. प्रारंभीचे फलंदाज गमावल्यानंतर मायकेल ब्रेसवेल (51) आणि डॅरिल मिशेल (नाबाद 78) या जोडीने इनिंग्सला स्थैर्य दिलं. दोघांनी संयमी पण प्रभावी खेळी करत प्रतिस्पर्ध्यांची पकड सैल केली. इंग्लंडकडून ब्रायडन कार्सने झुंजार गोलंदाजी करत 3 फलंदाज बाद केले, पण मिशेलच्या संयमी फलंदाजीपुढे सर्व प्रयत्न निष्फळ ठरले.
न्यूझीलंडने 36.4 षटकांत सहा विकेट गमावून लक्ष्य गाठत विजयावर शिक्कामोर्तब केले. ब्रेसवेलच्या तडाख्याने आणि मिशेलच्या स्थिरतेने इंग्लंडला मालिकेच्या पहिल्याच सामन्यात धक्का दिला.
आता मालिकेत 1-0 ने आघाडी घेतलेल्या न्यूझीलंडकडे घरच्या मैदानावर मालिका विजयाचे स्वप्न बघण्याची संधी आहे, तर इंग्लंडसाठी पुढील सामना ‘करो या मरो’ ठरणार आहे.
