संपूर्ण राज्यभरात शिक्षक पात्रता परीक्षा (TET) सुरू आहे. या परीक्षेचा पेपर फोडण्याच्या तयारीत असणाऱ्या टोळीचा पर्दाफाश मुरगुड पोलिसांनी कोल्हापूर स्थानिक गुन्हे अन्वेषण पथकाच्या मदती केला असून कागल तालुक्यातील सोनगे गावातून नऊ जणांना ताब्यात घेतले आहे. प्रकरणाची व्याप्ती फार मोठी असून यात अनेक लोक गुंतले असण्याची शक्यता आहे. मुरगुड पोलीस या घटनेचा जलदगतीने तपास करत आहेत.
आज राज्यभरामध्ये शिक्षक पात्रता परीक्षेसाठी लाखो परीक्षार्थी शिक्षक राज्यातील अनेक केंद्रांवर ही परीक्षा देत आहेत. या पार्श्वभूमीवर कोल्हापूर जिल्ह्यात हा पेपरच फोडण्याचा प्रयत्न झाल्याने शिक्षण क्षेत्रात खळबळ उडाली आहे. ताब्यात घेतलेल्या आरोपींमध्ये काही शाळेतील परीक्षार्थी शिक्षकांचाही सहभाग असून हे सर्व आरोपी कागल तालुक्यातील सोनगे येथून पोलिसांनी ताब्यात घेतले. ताब्यात घेतलेले संशयित कागल आणि राधानगरी तालुक्यातील आहेत.
पेपर फुटीच्या घटनेची मुरगूड पोलिसांना कुणकुण होती. त्यामुळे शनिवार सायंकाळपासून रात्रभर पोलीस या घटनेचा तपास करत होत . रविवारी मध्यरात्री पोलीस पथकाने या टीईटी पेपर फोडणाऱ्या टोळीला सोनगे येथून जेरबंद केले. पोलीस तपासात अनेक धक्कादायक नावे उघड होण्याची शक्यता पोलिसांनी वर्तवली आहे.
