धावांचा पाऊस आणि क्रिकेटचा थरार

वर्सोव्याचे आमदार हारून खान यांच्या पुढाकाराने आयोजित आमदार चषक क्रिकेट स्पर्धेच्या उपांत्यपूर्व आणि उपांत्य फेरीच्या लढतीत क्रिकेटप्रेमींना धावांचा पाऊस आणि षटकारांची आतषबाजी पाहायला मिळाली.

आज वर्सोव्यात सुरू असलेल्या या क्रिकेट सोहळ्याला शिवसेना सचिव आणि आमदार मिलिंद नार्वेकर आणि आमदार अस्लम शेख यांची विशेष उपस्थिती लाभली. गेले तीन दिवस क्रिकेटचा तूफानी खेळ पाहाणार्या क्रिकेटप्रेमींना आज उपांत्यपूर्व सामन्यात आदर्श नगर असॅसिन्सने मॅग्नेटिक मोमीन गुजरातचा पराभव केला तर म्हाडा मास्टर्स इलेव्हन संघाने आनंद नगर अव्हेंजर्स संघाचा धुव्वा उडवत शानदार विजय नोंदवला. तसेच व्हायरंट वर्सोवा संघाने अंतिम चार संघात स्थान मिळवले. रोमहर्षक लढतीत ओशिवरा उस्ताद संघाने यारी रोड योद्धा संघावर मात केली. उपांत्यपूर्व फेरीतील चारही सामने थरारक झाल्यामुळे क्रिकेटचा संघर्ष आज आपल्या सर्वोच्च क्षणावर होता.

नुकतेच मुंबई क्रिकेट संघटनेच्या गव्हर्निंग कौन्सिलवर निवडून आलेल्या मिलिंद नार्वेकर यांनी आमदार हारून खान यांच्या प्रयत्नांचे विशेष कौतुक केले. वर्सोवा विधानसभा मतदारसंघातील तरुणांसाठी इतक्या मोठया स्तरावर क्रिकेट स्पर्धेचे आयोजन करून एक हारून खान यांनी अतिशय सकारात्मक पाऊल उचलले आहे. खेळाच्या माध्यमातून तरुणांना एकत्र आणणे आणि त्यांना व्यासपीठ उपलब्ध करून देणे हे प्रशंसनीय आहे. एमसीएचा पदाधिकारी या नात्याने तळागाळातील क्रिकेटला माझा नेहमीच पाठिंबा राहील, असेही आश्वासन त्यांनी दिले.