>>मेधा पालकर
माहिती तंत्रज्ञानाच्या झपाटय़ाने बदलणाऱया युगात मराठी माध्यमातील विद्यार्थीही मागे राहणारे नाहीत, हे पुन्हा एकदा सिद्ध झाले आहे. रयत शिक्षण संस्थेच्या नारायणराव सणस महाविद्यालयाच्या अत्याधुनिक एआय प्रयोगशाळेतून वडगाव खुर्द परिसरात उत्तम संशोधन सुरू झाले आहे. या इयत्ता नववीतील एका विद्यार्थ्याने ‘बिबटय़ा पकडण्यासाठी उपयुक्त असा खास सीसीटीव्ही’ विकसित करून थक्क केले आहे. बिबटय़ा कधी येतो, कुठे जातो, त्याची हालचाल कशी होते या सगळ्याचा अचूक मागोवा घेणारी ही एआय यंत्रणा आता परिसरातील सुरक्षेतही मोलाचा वाटा उचलू शकते.
“मराठी माध्यम असूनही आपल्या विद्यार्थ्यांनी स्पर्धेत टिकावं म्हणून ही लॅब उभारली,” असे प्राचार्य लक्ष्मण रोडे अभिमानाने सांगतात.
मे महिन्यापासून संस्थेच्या पातळीवर एआय प्रकल्प सुरू झाला. शिक्षकांना विशेष प्रशिक्षण देण्यात आले. पाचवी ते बारावीच्या विद्यार्थ्यांसाठी स्वतंत्र पुस्तके तयार झाली. रोजच्या तासांत जादाचे तास घेऊन मुलांना एआय शिकवले जाऊ लागले. दोन हजार विद्यार्थ्यांपैकी तब्बल 250 विद्यार्थी आज एआयचे प्रशिक्षण घेत आहेत.
या उपामाला भक्कम हातभार लावला तो विभावरी सणस यांनी. नारायण सणस विद्यालयाच्या सदस्या आणि संस्थेच्या अध्यक्षा असलेल्या विभावरीताईंनी 30 संगणकांची देणगी देऊन लॅब सुसज्ज केली. पुणे महापालिकेचे पहिले महापौर बाबुराव सणस हे त्यांचे पणजोबा. त्यांनी रयत शिक्षण संस्थेला दिलेल्या जागेवरच पुढे हे महाविद्यालय उभं राहिलं.
लॅबमध्ये थिअरी आणि प्रॅक्टिकल अशा दोन्ही पद्धतींनी कोडिंग व रोबोटिक्स शिकवले जात आहे. वयोगटानुसार अभ्यापाम आखण्यात आलेला आहे. इतकेच नव्हे तर दहावी-बारावीनंतर काही कंपन्या या मुलांना नोकरीच्या संधी देण्यासही उत्सुक आहेत. मुलं नवनवीन सॉफ्टवेअर तयार करत आहेत.
“विद्यार्थी मागे राहू नयेत म्हणून त्यांना हायस्कूलपासून एआयचे शिक्षण देणारी ही पहिलीच लॅब आहे. सध्या 30 विद्यार्थ्यांची बॅच सुरू असून उन्हाळी सुट्टय़ांमध्ये बाहेरील विद्यार्थ्यांसाठीही प्रशिक्षण देण्याचा आमचा विचार आहे,” अशी माहिती प्राचार्य रोडे यांनी दिली.
वडगाव खुर्दचे हे नारायणराव सणस महाविद्यालय आणि सणस कुटुंबीयांचा उपाम मराठी विद्यार्थ्यांना भविष्याच्या दारात नेणारा नवा प्रकाशकिरण ठरत आहे!
