कसोटी मालिकेतील दक्षिण आफ्रिकेकडून अनपेक्षित पराभवामुळे टीकेची धनी ठरलेली टीम इंडिया आता वन डे मालिकेत त्या पराभवाचे उद्दे काढण्यासाठी मैदानावर जिवाचे रान करताना दिसेल. हिंदुस्थानी संघाने शुक्रवारी रांचीमध्ये सराव केला. संघाची रविवारी (दि. ३०) दक्षिण आफ्रिकेविरुद्ध पहिली वन डे होत आहे. कसोटी मालिकेत सुपडा साफ झाल्यानंतर उभय संघांमध्ये उद्यापासून तीन सामन्यांच्या वन डे मालिकेला सुरुवात होत आहे. कसोटी मालिकेतील पराभवाचा बदला घेण्याच्या इराद्याने केएल राहुलच्या नेतृत्वाखालील भारतीय संघ ही मालिका खेळणार आहे.
टीम इंडियाला दुखापतीचे ग्रहण!
नियमित कर्णधार शुभमन गिल व उपकर्णधार श्रेयस अय्यर दुखापतीमुळे या मालिकेबाहेर असल्याने केएल राहुलच्या खांद्यावर संघाच्या नेतृत्वाची जबाबदारी आहे. रोहित शर्मा, विराट कोहली व रवींद्र जाडेजाही या संघाचा भाग असतील, तर जसप्रीत बुमराला या वन डे मालिकेसाठी विश्रांती देण्यात आली आहे, तर अष्टपैलू हार्दिक पंड्याही दुखापतीमुळे संघाबाहेर आहे.
रोहित-विराटवर मदार
कसोटी मालिकेतील पराभवामुळे वन डे मालिकेला आता महत्त्व प्राप्त झाले आहे. या मालिकेसाठी विराट कोहलीसह अनेक खेळाडू आधीच रांचीमध्ये पोहोचले आहेत. रोहित शर्मा व विराट कोहली नेट्समध्ये कसून सराव करतानाचे व्हिडीओ पाहायला मिळाले आहेत. हे दोघेही दिग्गज वर्षभरानंतर घरच्या मैदानावर खेळताना दिसणार आहेत. या स्टार खेळाडूंमुळे टीम इंडियाचे मनोबल नक्कीच उंचावलेले असेल. मात्र, संघाची मदार असलेल्या रोहित-विराट या अनुभवी जोडीला आपल्या लौकिकास साजेशी कामगिरी करावी लागणार आहे. रोहित शर्मा आणि विराट कोहली नऊ महिन्यांनंतर घरच्या मैदानावर एकत्र आंतरराष्ट्रीय क्रिकेट सामना खेळतील. दोघांनी शेवटचा सामना इंग्लंडविरुद्ध यंदा १२ फेब्रुवारी रोजी अहमदाबादच्या नरेंद्र मोदी स्टेडियममध्ये खेळला होता. रोहित आणि विराट यांनी पहिल्या वन डेपूर्वी नेट प्रॅक्टिस केली. दोघेही बऱ्याच काळानंतर घरच्या प्रेक्षकांसमोर खेळताना दिसतील.
‘टीम इंडियाला स्वतःला रीसेट करण्याची संधी आहे. गेले दोन आठवडे निराशाजनक होते, पण आता आपल्याकडे स्वतःला रीसेट करण्यासाठी काही दिवस आहेत. आपली पूर्ण ऊर्जा वनडे क्रिकेटवर केंद्रित करायची आहे. गेल्या काही वर्षांत संघाने या फॉरमॅटमध्ये चांगला खेळ दाखवला आहे. कसोटी मालिका जिंकून आलेला दक्षिण आफ्रिकेचा संघ खूप आत्मविश्वासात आहे आणि असे संघ नेहमीच आव्हानात्मक असतात. रंगीत जर्सी आणि पांढरा चेंडू वेगळी ऊर्जा आणतो.’
मॉर्ने मॉर्केल (गोलंदाजी प्रशिक्षक, टीम इंडिया)
हेड टू हेड
हिंदुस्थान आणि दक्षिण आफ्रिका यांनी आतापर्यंत ९४ एकदिवसीय सामने खेळले आहेत. द. आफ्रिका संघाने यापैकी ५१ सामने जिंकले आहेत, तर भारताने ४० सामने जिंकले आहेत. हिंदुस्थानी भूमीवर, दोन्ही संघांमध्ये ३२ एकदिवसीय सामने खेळले आहेत. यादरम्यान टीम इंडियाने १८ सामने जिंकले आहेत, तर १४ सामने गमावले आहेत.
वन डे मालिकेसाठी उभय संघ
हिंदुस्थान – रोहित शर्मा, यशस्वी जैस्वाल, विराट कोहली, तिलक वर्मा, केएल राहुल (कर्णधार, यष्टीरक्षक), ऋषभ पंत (यष्टीरक्षक), वॉशिंग्टन सुंदर, रवींद्र जाडेजा, कुलदीप यादव, नितीश कुमार रेड्डी, हर्षित राणा, ऋतुराज गायकवाड, प्रसिध कृष्णा, अर्शदीप सिंग, ध्रुव जुरेल.
दक्षिण आफ्रिका – टेम्बा बावुमा (कर्णधार), ओटनील बार्टमन, कॉर्बिन बॉश, मॅथ्यू ब्रिट्झके, डेवाल्ड ब्रेविस, नांद्रे बर्गर, क्विंटन डी कॉक, टोनी डी झोर्झा, रुबिन हरमन, केशव महाराज, मार्को यान्सन, एडन मारक्रम, लुंगी एनगिडी, रायन रिकल्टन, प्रेनेलन सुब्रायन.
