हरयाणातील रोहतक जिल्ह्यात एक धक्कादायक घटना घडली. रोहतकच्या हिमायूंपुर गावातील रहिवासी असलेला आंतरराष्ट्रीय पॅरा वेटलिफ्टर रोहितची भिवानी येथे एका विवाह समारंभातून परतत असताना वऱ्हाडींनी काठी आणि लोखंडी रॉडने बेदम मारहाण करून हत्या केली. रोहितला गंभीर अवस्थेत शनिवारी रात्री पीजीआय रोहतक येथे दाखल करण्यात आले होते. मात्र तेथे रविवारी उपचारादरम्यान त्याचा मृत्यू झाला. या घटनेमुळे परिसरात एकच खळबळ उडाली आहे.
नेमकं काय घडलं?
मिळालेल्या माहितीनुसार, रोहित त्याच्या मित्रासह शुक्रवार रात्री विवाह सोहळ्यात गेला होता. समारंभात, वरातीत सहभागी झालेले काही तरुण दारूच्या नशेत मुलींची छेडछाड आणि शिवीगाळ करत होते. रोहित आणि त्याचा मित्र जतिनने याला विरोध केला. त्यामुळे वऱ्हाडींसोबत त्यांचे जोरदार भांडण झाले. मात्र काही वेळाने कुटुंबातील सदस्यांनी मध्यस्थी करून हा वाद शांत केला.
दरम्यान लग्नसोहळा आटोपून रोहित मध्यरात्री सुमारे 12 वाजता आपल्या स्कॉर्पिओ गाडीतून घरी जायला निघाला. तेव्हा रिवाड़ी खेडा–बामला रेल्वे फाटकाजवळ राहुल तिगड़ाना आणि त्याच्या 15 ते 20 साथीदारांनी रोहितच्या गाडीला घेराव घातला. त्याची गाडी थांबवून त्यांनी रोहितवर क्रूरपणे हल्ला केला. लाठ्या, काठ्या, लोखंडी रॉड आणि धारदार शस्त्रांनी वार करून त्याला गंभीर जखमी केले.
घटनेची माहिती मिळताच पोलिसांचे पथक तातडीने घटनास्थळी पोहोचले. आणि त्यांनी जखमी रोहितला तेथील जवळच्या रुग्णालयात दाखल करण्यात आले. मात्र रविवारी सकाळी उपचारादरम्यान रोहितचा मृत्यू झाला. रोहित हा कुटुंबातील एकुलता एक मुलगा असल्यामुळे त्याच्या निधनानंतर कुटुंबावर दु:खाचा डोंगर कोसळला आहे. दरम्यान पोलिसांनी आरोपींविरोधात हत्येचा गुन्हा दाखल केला आहे. तसेच आरोपींचा शोधही सुरू केला आहे.
