महापालिका निवडणुकीत राजकीय वादातून धक्कादायक घटना घडली असून महाराष्ट्र नवनिर्माण सेनेच्या विद्यार्थी आघाडीचे सोलापूर अध्यक्ष बाळासाहेब सरवदे यांची संध्याकाळी निर्घृण हत्या करण्यात आली. गंभीर अवस्थेत त्यांना मार्पंडेय रुग्णालयात दाखल करण्यात आले होते. मात्र उपचारादरम्यान त्यांचा मृत्यू झाल्याचे डॉक्टरांनी घोषित केले. या घटनेनंतर संतप्त कार्यकर्त्यांनी रुग्णालयात तोडफोड केल्याची माहिती समोर आली आहे. महापालिका निवडणुकीसाठी उमेदवारी अर्ज मागे घेण्याच्या शेवटच्या दिवशी ही घटना घडली. प्रभाग 2 मध्ये भाजपच्या उमेदवार शीतल शिंदे आणि बाळासाहेब सरवदे यांच्यात वाद झाल्याची माहिती मिळाली आहे. अर्ज मागे घेण्याच्या शेवटच्या दिवशी उमेदवार दिल्यामुळे निवडणूक बिनविरोध होऊ शकली नाही, याबाबत नाराजी व्यक्त केली जात होती. उमेदवार देण्यात बाळासाहेब सरवदे यांनी पुढाकार घेतल्याच्या संशयातून ही हत्या झाल्याचा प्राथमिक अंदाज व्यक्त केला जात आहे.सोलापूर महापालिका निवडणुकीतील अनेक प्रभाग आधीपासूनच संवेदनशील असल्याचे मानले जात होते आणि या घटनेनंतर निवडणुकीचा रंग अधिकच तापण्याची शक्यता वर्तवली जात आहे. पोलिसांनी गुन्हा दाखल करून तपास सुरू केला असून आरोपींचा शोध सुरू आहे. संतप्त कार्यकर्त्यांनी सोलापूर सहकारी मार्पंडेय रुग्णालयातील सामानाची तोडफोड केली. सोलापूर शहरातील अनेक प्रभाग संवेदनशील आहेत. पोलीस आयुक्तालयाने वेळीच उपाययोजना न केल्यास या निवडणुका तणावपूर्ण वातावरणात होण्याची शक्यता आहे.
