आंध्र प्रदेशातील मार्कापुरमजवळील रायवरम येथे आज पहाटे एक भीषण दुर्घटना घडली. एका खाजगी प्रवासी बसची खडी वाहून नेणाऱ्या टिपर लॉरीला जोरदार धडक बसली. या भीषण धडकेनंतर बसने अचानक पेट घेतल्याने आठ प्रवाशांचा होरपळून मृत्यू झाला, तर 18 जण गंभीर जखमी झाले आहेत. हा अपघात एका स्लॅबच्या खाणीजवळ घडला असून, बसला लागलेल्या आगीमुळे अनेक प्रवासी आतमध्येच अडकल्याने मृतांचा आकडा वाढण्याची भीती व्यक्त होत आहे.
मिळालेल्या माहितीनुसार, भरधाव वेगात असलेल्या बसने समोरून येणाऱ्या टिपरला धडक दिली. धडक इतकी भीषण होती की काही वेळातच बस आगीच्या भक्ष्यस्थानी पडली आणि पूर्णपणे जळून खाक झाली. घटनेची माहिती मिळताच स्थानिक प्रशासन आणि आपत्कालीन सेवा घटनास्थळी दाखल झाल्या असून युद्धपातळीवर बचावकार्य सुरू करण्यात आले आहे. मार्कापुरमचे पोलीस उपअधीक्षक नागराजू यांनी दिलेल्या माहितीनुसार, आतापर्यंत 18 जखमींना सुखरूप बाहेर काढून उपचारासाठी जवळच्या रुग्णालयात दाखल करण्यात आले आहे.
बचाव पथकांकडून सध्या मृतदेहांची ओळख पटवण्याचे काम सुरू असून त्यांच्या नातेवाईकांशी संपर्क साधण्याचे प्रयत्न केले जात आहेत. बसला लागलेल्या भीषण आगीमुळे काही मृतदेह अद्यापही बसमध्येच अडकले असल्याची शक्यता वर्तवण्यात येत आहे, ज्यामुळे ते बाहेर काढण्यात अडचणी येत आहेत. पोलीस या प्रकरणाचा अधिक तपास करत असून मृतांची ओळख पटल्यानंतर पुढील कार्यवाही केली जाणार असल्याचे स्पष्ट करण्यात आले आहे.
