अमेरिका-इस्रायल इराण युद्धात दोन आठवड्यांची शस्त्रसंधी झाली असून आता कायमस्वरुपी शांतता प्रस्थापित करण्यासाठी अमेरिका-इराणमध्ये चर्चा होत आहे. त्यासाठी अमेरिकेचे उपराष्ट्रपती जेडी व्हान्स इस्लामाबादमध्ये दाखल झाले आहेत. आखातातील तणाव कमी होईल की नाही, हे या बैठकीवर अवलंबून असेल. आता कतारसह इतर परदेशी बँकांमधील इराणची संपत्ती मुक्त करण्यास अमेरिका तयार झाल्याची माहिती मिळत आहे. ‘आज तक’ने याबाबतचे वृत्त दिले आहे.
अमेरिकेचे उपराष्ट्रपती जेडी व्हान्स इस्लामाबादमध्ये दाखल झाले आहेत. त्यामुळे आता सर्वांचे लक्ष या ऐतिहासिक शांतता चर्चेवर लागले आहे. हा संवाद कायमस्वरूपी युद्धविरामासाठीची शेवटची आणि सर्वात मोठी संधी आहे, अशी जगाला आशा आहे. संपूर्ण आखाती देशातील शांतता या बैठकीच्या निकालावर अवलंबून आहे. या दीर्घकाळ चाललेल्या तणावावर कायमस्वरूपी तोडगा काढण्याचा प्रयत्न होत आहे.
अमेरिका आणि इराण यांच्यात सुरू असलेल्या शांतता चर्चेत एक मोठे यश मिळाले आहे. इराणी सूत्रांचा हवाला देत रॉयटर्सने दावा केला आहे की, कतार आणि इतर परदेशी बँकांमध्ये ठेवलेले इराणचे पैसे सोडण्यास अमेरिका सहमत झाली आहे. त्या बदल्यात, इराणने होर्मुझच्या सामुद्रधुनीतून जहाजांना सुरक्षित मार्ग देण्याचे वचन दिले आहे. या कृतीकडे अमेरिकेच्या सदिच्छा आणि शांतता चर्चेबाबतच्या गांभीर्याचे प्रतीक म्हणून इराण पाहत आहे.
इस्लामाबादमधील चर्चेच्या अगदी आधी, इराणचे उपराष्ट्रपती मोहम्मद रझा आरिफ यांनी अमेरिकेला एक अत्यंत कठोर आणि थेट संदेश दिला आहे. इराणने हे स्पष्ट केले आहे की, जर ते ‘अमेरिका फर्स्ट’च्या प्रतिनिधींशी बोलत असतील, तर असा करार शक्य आहे जो दोन्ही देशांसाठी आणि जगासाठी फायदेशीर ठरेल. मात्र, जर अमेरिका ‘इस्रायल फर्स्ट’च्या मानसिकतेने चर्चेसाठी पुढे आली, तर कोणताही करार होणार नाही. त्यामुळे आता जगाचे लक्ष या चर्चेकडे लागले आहे.
