अमरनाथ यात्रा 3 जुलै ते 28 ऑगस्टदरम्यान होणार आहे. यावेळी जम्मू आणि कश्मीर पोलिसांनी दर्शनासाठी येणाऱ्या यात्रेकरूंसाठी अत्यंत कडक आणि आधुनिक सुरक्षा व्यवस्था केली आहे. जम्मू आणि कश्मीर पोलिसांनी ‘पहचान’ अॅप सुरू केले आहे. या अॅपमुळे यात्रा मार्गावर काम करणाऱ्या घोडेस्वार, हमाल, दुकानदार आणि टॅक्सीचालक यांची पोलीस पडताळणी करणे शक्य होईल.
अनंतनागचे एसएसपी अमोद अशोक नागपुरे यांनी स्पष्ट केले की, या वर्षीच्या सुरक्षा व्यवस्थेतील सर्वात महत्त्वाचा बदल म्हणजे ‘पहचान’ अॅपचा वापर सुरू करण्यात आला आहे. हा एक अतिशय प्रगत आणि अनोखा उपक्रम आहे. याच्या माध्यमातून तीर्थयात्रेच्या मार्गावर काम करणाऱ्या सर्व सेवा पुरवठादारांची जसे की घोडेस्वार, हमाल आणि टॅक्सीचालक यांची अॅपआधारित पडताळणी केली जात आहे.
पडताळणी पूर्ण झाल्यावर पोलीस एक विशेष क्यूआर कोड जारी करतात. या क्यूआर कोडचे सर्वात महत्त्वाचे वैशिष्ट्य म्हणजे कोणताही पर्यटक, यात्रेकरू किंवा सुरक्षा कर्मचारी तो आपल्या मोबाईल फोनने स्कॅन करू शकतो. स्कॅन केल्यावर सेवा पुरवठादाराची संपूर्ण माहिती समजून घेणे यात्रेकरूंना सोपे होईल.
