चेन्नईच्या एम. ए. चिदंबरम स्टेडियमवर हिंदुस्थान आणि अफगाणिस्तान यांच्यातीस तिसऱ्या वनडे सामन्यात टीम इंडियाने एक नवा इतिहास रचला आहे. प्रथम फलंदाजी करताना अफगाणिस्तानचा संघ 218 धावांवर गारद झाला. प्रसिद्ध कृष्णाने सर्वाधिक 5 विकेट्स घेत अफगाणिस्तानची दांडी गुल केली. प्रत्युत्तरात आव्हानाचा पाठलाग करताना रोहित शर्मा आणि यशस्वी जयस्वालने धडाकेबाज सुरुवात करुन दिली. पहिल्याच षटकात त्यांनी आपरे मनसुबे स्पष्ट करत ओमरझाईचा खरपूस समाचार घेतला आणि 22 वर्षांपूर्वीचा विक्रम मोडित काढला.
अफगाणिस्तानकडून पहिले षटक अझमतुल्लाह ओमरझाईने हाताळले. मात्र, त्याने षटकाची सुरुवात टीम इंडियाचे बाजून केली. हिंदुस्थानी डावाचा पहिला अधिकृत चेंडू टाकण्यापूर्वीच संघाच्या खात्यात 5 अतिरिक्त धावा जमा झाल्या होत्या. या पहिल्या षटकातील सर्व चेंडूंचा सामना धडाकेबाज फलंदाज यशस्वी जयस्वालने केला. जयस्वालने ओमरझाईच्या गोलंदाजीचा खरपूस समाचार घेत आपल्या बॅटमधून तीन देखणे चौके मारून 14 धावा कुटल्या. अशाप्रकारे, अतिरिक्त 9 धावा आणि जयस्वालच्या 14 धावांच्या जोरावर पहिल्या षटकाअखेर टीम इंडियाने बिनबाद 23 धावा चोपून काढल्या. जी वनडे क्रिकेटच्या इतिहासातील हिंदुस्थानची पहिल्या षटकातील सर्वोच्च धावसंख्या ठरली आहे. टीम इंडियाने यापूर्वी 2020 मध्ये सिडनी येथे ऑस्ट्रेलियाविरुद्ध पहिल्या षटकात 20 धावा केल्या होत्या, तर आता अफगाणिस्तानविरुद्ध 23 धावा करत नवा कीर्तिमान स्थापित केला आहे.
या धमाकेदार सुरुवातीनंतर टीम इंडियाच्या डावाला आणखी बळकटी मिळाली ती कर्णधार रोहित शर्मा आणि यशस्वी जयस्वाल यांच्यातील शतकीय भागीदारीमुळे. या दोघांनी अफगाणिस्तानच्या गोलंदाजांना निष्प्रभ करत पहिल्या विकेटसाठी शतकी पल्ला पार केला. या शतकीय भागीदारीसह रोहित शर्माने वनडे क्रिकेटमध्ये एका विशेष विक्रमाला गवसणी घातली आहे. एकदिवसीय क्रिकेटच्या इतिहासात सर्वाधिक वेळा शतकीय भागीदारीचा भाग असणाऱ्या खेळाडूंच्या यादीत रोहित शर्मा आता 71 शतकीय भागीदाऱ्यांसह चौथ्या स्थानावर पोहोचला आहे. या प्रतिष्ठेच्या यादीत हिंदुस्थानचा महान फलंदाज सचिन तेंडुलकर 99 शतकीय भागीदाऱ्यांसह अव्वल स्थानावर विराजमान आहेत.
