हिंदुस्थानने आपल्या अण्वस्त्रवाहू बॅलिस्टिक क्षेपणास्त्र क्षमतेला आणखी मजबूत करत मध्यम पल्ल्याच्या ‘अग्नि-४’ या बॅलिस्टिक क्षेपणास्त्राची यशस्वी चाचणी घेतली आहे. ६ ऑगस्ट २०२६ रोजी ओडिशातील चांदीपूर येथील केंद्रावरून हे क्षेपणास्त्र यशस्वीरीत्या डागण्यात आले.
या चाचणीदरम्यान क्षेपणास्त्राच्या सर्व तांत्रिक आणि उपयोगाशी संबंधित निकषांची यशस्वी पडताळणी करण्यात आली. ही चाचणी स्ट्रॅटेजिक फोर्सेस कमांडच्या (SFC) अंतर्गत पार पडली.
‘अग्नि-४’ हे हिंदुस्थानच्या अग्नि क्षेपणास्त्र मालिकेतील एक महत्त्वाचा दुवा आहे. हे मध्यम पल्ल्याचे बॅलिस्टिक क्षेपणास्त्र असून ते सुमारे ४,००० किलोमीटर अंतरावरील लक्षाचा अचूक वेध घेण्यास सक्षम आहे. चांदीपूर येथून केलेल्या या चाचणीत क्षेपणास्त्राने ठरवून दिलेल्या मार्गावर यशस्वी उड्डाण केले आणि सर्व निश्चित मानके पूर्ण केली.
संरक्षण शास्त्रज्ञ आणि लष्करी अधिकाऱ्यांनी ही चाचणी पूर्णपणे यशस्वी झाल्याचे घोषित केले आहे. स्ट्रॅटेजिक फोर्सेस कमांडच्या देखरेखीखाली ही चाचणी झाल्याचा अर्थ असा की, हे क्षेपणास्त्र आता सक्रिय लष्करी वापरासाठी पूर्णपणे सज्ज झाले असून त्याच्या विश्वासार्हतेवर शिक्कामोर्तब झाले आहे.
