जुन्या व दुर्मीळ कागदपत्रांचे जतन करून ती ऑनलाइन उपलब्ध करून देण्यासाठी कागदपत्रांचे स्कॅनिंग करण्यात येत आहे. नगर जिल्ह्यातील या अभिलेखांचे स्कॅनिंग सुरू असून, ही कार्यवाही अंतिम टप्प्यात आहे. तहसील व महसूल विभागाने मिळून आतापर्यंत एक कोटी 83 लाख 84 हजार 282 कागदपत्रांचे स्कॅनिंग केले आहे. या कागदपत्रांचे स्कॅनिंग पूर्ण झाल्यानंतर ही आवश्यक कागदपत्रे नागरिकांना एका क्लिकवर उपलब्ध होणार आहेत.
भूमिअभिलेख कार्यालयातून जमीनविषयक काही कागदपत्रे मिळवायची असतील, तर नागरिकांना अनेक अडचणींचा सामना करावा लागत होता. अनेक वेळा कार्यालयाच्या चकरा माराव्या लागत होत्या. धूळ खात पडलेल्या जुनाट रेकॉर्डमधून नागरिकांना हवी असलेली कागदपत्रे शोधण्यात खूप वेळ जात होता. त्यामुळे नागरिकांच्या दृष्टीने महत्त्वाची असणारी कागदपत्रे त्यांना वेळेवर मिळत नव्हती. यामुळे नागरिकांच्या तक्रारीही वाढल्या होत्या. आता मात्र भूमिअभिलेख कार्यालयातील कागदपत्रांचे स्कॅनिंग करण्यात येत आहे. महसूल विभागाच्याही कागदपत्रांचे स्कॅनिंग केले जात आहे. राज्यातही या पद्धतीने कामकाज केले जात आहे. या निमित्ताने कार्यालयातील ब्रिटीश काळापासूनची कागदपत्रे स्कॅनिंग केली जात आहेत. यामध्ये गुणाकार बुक, आकार फोड, वसलेवार बुक, ताबा पावती, मिळकत पत्रिका, चौकशी रजिस्टर, गाव धारिका अशा महत्त्वाच्या कागदपत्रांचा समावेश आहे. स्कॅनिंगनंतर रेकॉर्ड ऑनलाइनही उपलब्ध होणार असल्याचे सांगितले जात आहे. त्यामुळे नागरिकांचा त्रास कमी होणार आहे.
नव्या वर्षात अडचणी कमी
कागदपत्रांचे स्कॅनिंग करून त्यांचे रुपांतर ई-अभिलेखांत करण्यात येणार आहे. या कार्यालयातील सर्व कागदपत्रांचे स्कॅनिंग करून या कागदपत्रांची मेटा डाटा एन्ट्री इमेजेस करण्यात येत आहे. त्यामुळे ही कागदपत्रे मागणी केल्यानंतर तत्काळ उपलब्ध करून देण्यात अडचणी येणार नाहीत. नव्या वर्षात नागरिकांच्या समस्या यामुळे कमी होणार आहेत. प्रत्येक वेळी कार्यालयात जाण्याची गरज राहणार नाही.
या कागदपत्रांचे स्कॅनिंग
जिल्ह्यातील तहसील व भूमिअभिलेख कार्यालयातील टिपण, गुणाकार बुक, जबाब, आकारफोड, वसलेवार बुक, ताबा पावती, मिळकत पत्रिका, चौकशी रजिस्टर, गाव धारिका अशा प्रकारच्या सर्व कागदपत्रांचे स्कॅनिंग झाले आहे. तहसील विभागाकडील जवळपास 19 लाख 6 हजार 747 आणि महसूल विभागाकडील एक कोटी 64 लाख 77 हजार 535 कागदपत्रांचे स्कॅनिंग पूर्ण करण्यात आले आहे.
