कोल्हापूर बेळगावसह सीमाभागात कानडीकरणाच्या सक्तीचा वरवंटा फिरवला जात असून, मराठी भाषिकांच्या हक्कांची पायमल्ली केली जात आहे. भाजपची सत्ता असलेल्या बेळगाव महापालिकेतून मराठी भाषाच हटविली जात आहे. सर्व कागदपत्रे, व्यवहाराची भाषा फक्त कन्नड करण्याचा फतवा काढला आहे. महापौर, उपमहापौरांच्या वाहनांवरील नामफलक कन्नडमध्ये केले. तसेच वाहनांवरील भगवा ध्वजही हटविण्यात आला आहे. दरम्यान, कन्नड सक्तीमुळे मराठी भाषिकांमध्ये तीव्र संताप व्यक्त होत आहे.
बेळगाव महापालिकेत कन्नड विकास प्राधिकरणाची आढावा बैठक झाली. प्राधिकरणाचे अध्यक्ष पुरुषोत्तम बिळिमले, सचिव संतोष हनगल यांनी सर्व सरकारी कार्यालयांमध्ये कन्नड सक्तीची अंमलबजावणी करावी. जनतेलाही कन्नड भाषेतच सेवा पुरवल्या पाहिजेत, अशा सूचना केल्या. सर्व नामफलक, कागदपत्रे कन्नड भाषेत करण्याची अंमलबजावणी तत्काळ सुरू केली. अंगणवाडी स्तरापासून सर्व सरकारी कार्यालयांत व्यवहाराची भाषा कन्नड ठेवण्याचे निर्देश देण्यात आले आहेत.
सक्तीचे कानडीकरण
बेळगाव महापालिकेत भाजपची एकहाती सत्ता असून, मंगेश पवार हे महापौर आहेत. महापालिकेत राजरोसपणे कानडीकरण करण्यात येत असताना महापौर पवार आणि भाजप नगरसेवकांनी कोणतीही भूमिका घेतलेली नाही.
वृत्तपत्रांवर कारवाई
कन्नड विकास प्राधिकरणाने कन्नडविरोधी लिखाण करणाऱया मराठी वृत्तपत्रांवर कारवाई करण्याच्या सूचना बेळगाव जिल्हाधिकाऱयांना दिल्याचे प्राधिकरणाचे अध्यक्ष पुरुषोत्तम बिळिमले यांनी सांगितले.
मराठी घरात बोला
जर कोणी कन्नड बोलत नसेल तर संबंधित कर्मचाऱयांना नोटीस देऊन कारवाई केली जाईल. ‘तुमची भाषा मराठी असेल तर तुमच्या घरात बोला’ अशा सूचना प्राधिकरणाने दिल्या आहेत.
त्रिभाषा सूत्राला हरताळ
बेळगाव महापालिकेने अनेक वर्षांपासून मराठी, कन्नड आणि इंग्रजी असे त्रिभाषा धोरण स्वीकारले आहे. आजपर्यंत महापालिकेतील सर्व विभागांची कागदपत्रे, नामफलक या तिन्ही भाषेत होते. महाराष्ट्र एकीकरण समितीची सत्ता असेपर्यंत हे त्रिभाषा सूत्र जपण्यात आले. मात्र, भाजपची सत्ता महापालिकेत आल्यानंतर मराठी भाषाच हटविली जात असून, झपाटय़ाने कानडीकरण सुरू आहे. कन्नड विकास प्राधिकरणाच्या बैठकीनंतर महापालिकेतील फलक, कागदपत्रे कन्नड भाषेत करण्यात येत आहेत.
