भाजप म्हणजे भारतीय जुमला पार्टी असून निवडणुकांवेळी भाजपकडून जुमलेबाजी करण्यात येते. तसेच कोणीही भ्रष्टाचारी त्याचा पक्ष सोडून भाजपमध्ये दाखल झाल्यास त्या नेत्याला भाजपच्या वॉशिंग मशीनमधून स्वच्छ करण्यात येते. यावरून शिवसेनेनं (उद्धव बाळासाहेब ठाकरे) भाजपवर जबरदस्त टीका केली आहे. याबाबतचा व्हिडीओ शिवसेनेच्या अधिकृत ट्विटर हँडलवर पोस्ट करण्यात आला आहे.
भारतीय जुमला पार्टी आयोजित वॉशिंग मशीन अवॉर्ड २०२४ ! pic.twitter.com/RwxZ4gDBl6
— ShivSena – शिवसेना Uddhav Balasaheb Thackeray (@ShivSenaUBT_) December 31, 2024
पोस्ट केलेल्या व्हिडीओत भारतीय जुमला पार्टी आयोजित वॉशिंग मशीन अवॉर्ड 2024 असे असून त्यात विजेत्यांची नावेही घोषित करण्यात आली आहेत. यात विजेत्यांमध्ये पहिले नाव अजित पवार यांचे असून 70 हजार कोटी रोख आणि मानाचे उपमुख्यमंत्रीपद असे पारितोषिकाचे स्वरुप आहे. यात दुसरे नाव अशोक चव्हाण यांचे असून आदर्श व्यक्तिमत्व प्रमाणपत्र असे पारितोषिकाचे स्वरुप आहे. पुढील नाव किरीट सोमय्या यांचे असून आयएनएस घोटाळ्यातून मुक्तता मिळाल्याचे 57 कोटींचे प्रमाणपत्र असं पारितोषिकाचे स्वरुप आहे. त्यानंतर प्रफुल्ल पटेल याचं नाव असून एअर इंडिया विमानासहित 840 कोटींची हवाई सफर असे पोरितोषिकाचे स्वरुप आहे. पुढील नाव रवींद्र वायकर यांचे असून 500 कोटींचा जोगेश्वरी येथील भूखंड मोफत असे पारितोषिकाचे स्वरुप आहे, असे या व्हिडीओत दाखवण्यात आले आहे.
ईडी, सीबीआयच्या कृपेने भ्रष्टाचाराचे डाग स्वच्छ करण्याची हमी देणारी एकमेव मशीन भाजप वॉशिंग मशीन, भेटूया पुढच्या वर्षी नव्या विजेत्यांसह! तोपर्यंत भ्रष्टाचार करत रहा! भाजपमध्ये जात रहा!, असे व्हिडीओत दाखवले आहे. या व्हिडीओची सोशल मिडीयावर चर्चा होत आहे.
