सातारा येथे होत असलेल्या 99व्या अखिल भारतीय मराठी साहित्य संमेलनाचे उद्घाटन ज्येष्ठ लेखिका आणि विचारवंत डॉ. मृदुला गर्ग यांच्या हस्ते होणार असून, समारोप ज्ञानपीठ पुरस्काराने सन्मनित ज्येष्ठ लेखक रघुवीर चौधरी यांची प्रमुख उपस्थिती असेल, अशी माहिती अखिल भारतीय मराठी साहित्य महामंडळाचे अध्यक्ष प्रा. मिलिंद जोशी यांनी पत्रकार परिषदेत दिली.
महाराष्ट्र साहित्य परिषदेची शाहूपुरी शाखा आणि मावळा फाऊंडेशनतर्फे दि. 1 ते 4 जानेवारी या कालावधीत प्रसिद्ध साहित्यिक विश्वास पाटील यांच्या अध्यक्षतेखाली संमेलनाचे आयोजन करण्यात आले आहे. पत्रकारपरिषदेला प्रमुख कार्यवाह सुनिताराजे पवार, कोषाध्यक्ष विनोद कुलकर्णी उपस्थित होते. 1 जानेवारीला दुपारी 3 वाजता अखिल भारतीय साहित्य महामंडळाचे अध्यक्ष प्रा. मिलिंद जोशी यांच्या हस्ते ध्वजारोहण होणार आहे. ग्रंथदिंडीसह ग्रंथ प्रदर्शन, कवीकट्टा आणि गझलकट्टा यांचेही उद्घाटन होणार आहे. यावेळी साताऱयातील ज्येष्ठ साहित्यिकांचा सन्मान संमेलनाध्यक्ष डॉ. तारा भवाळकर यांच्या हस्ते संमेलनाच्या पूर्वसंध्येला होईल. संतश्रेष्ठ ज्ञानेश्वर महाराजांच्या 750 व्या जन्मोत्सवानिमित्त आणि जगद्गुरू संत तुकोबाराय यांच्या 375 व्या वैपुंठगमन वर्षानिमित्त संत साहित्याला अभिवादन करण्यासाठी ‘बहुरूपी भारुड’ हा कार्यक्रम डॉ.भावार्थ देखणे आणि त्यांचे सहकारी सादर करतील. दि. 2 जानेवारी रोजी सकाळी 10ः30 वाजता संमेलनाचे उद्घाटन मृदुला गर्ग यांच्या हस्ते होणार आहे. याच दिवशी निमंत्रितांचे पहिले कविसंमेलन रंगणार असून रात्री 8ः30 वाजता प्रसिद्ध अभिनेते प्रशांत दामले यांचा ‘शिकायला गेलो एक’ या नाटकाचा प्रयोग होईल.
संमेलनाची ठळक वैशिष्टय़े
1.संमेलनाच्या पूर्वसंध्येला चित्ररथांसह ग्रंथदिंडी 2. पुस्तक दालनातूनच संमेलनस्थळी जाणारा मार्ग 3.ग्रंथ प्रदर्शनाचा 4 दिवस लाभ 4.शालेय आणि महाविद्यालयीन विद्यार्थ्यांचा लक्षणीय सहभाग 5. जिह्यातील ज्येष्ठ साहित्यिकांचा विशेष सन्मान 6.संमेलनाच्या व महामंडळाच्या माजी अध्यक्षांना निमंत्रण 7. सरस्वती सन्मानप्राप्त साहित्यिकांनाही निमंत्रण 8. साहित्य अकादमी पुरस्कारप्राप्त बालसाहित्यकारांशी विद्यार्थ्यांचा संवाद 9. कवी आणि गझलकारांसाठी कविकट्टा 10. संमेलनात प्रथमच समकालीन पुस्तकांवर चर्चा 11. मान्यवर लेखकांच्या मुलाखती 12. चाकोरीबाहेरील विषयांवर परिसंवाद 13. 99 विद्यार्थी उद्घाटन सोहळ्यात गाणार ‘खरा तो एकचि धर्म… हे साने गुरुजींचे गीत. 14. ‘अटकेपार’ या स्मरणिकेतून उलगडणार सातारा जिह्यातील वैविध्य
महाराष्ट्राची हास्यजत्राचे आयोजन
‘जागतिक प्रकाशन व्यवहारात मराठी प्रकाशन व्यवहार कुठे आहे, या विषयावर परिसंवाद, ‘मराठी कोशवाङ्मय आणि विस्ताराच्या दिशा’ या विषयावर चर्चा, कथाकथन, ज्येष्ठ कवयित्री अनुराधा पाटील यांची मुलाखत, ज्येष्ठ लेखक प्रकाशक सन्मान कार्यक्रमात ज्येष्ठ लेखक ‘उचल्या’कार लक्ष्मण गायकवाड तसेच सुविद्या प्रकाशनाचे बाबुराव मैंदर्गीकर यांचा सत्कार उपमुख्यमंत्री अजित पवार यांच्या हस्ते करण्यात येणार आहे. रात्री 9 वाजता महाराष्ट्राची हास्यजत्रा या सांस्कृतिक कार्यक्रमाचे आयोजन करण्यात आले आहे.
